kuchh to hain paikar pareshan aazaron ke darmiyan

kuchh to haiñ paikar pareshāñ āzaroñ ke darmiyāñ

aur kuchh aazar pareshāñ pattharoñ ke darmiyāñ

sab ḳhabar hote hue pīr-e-muġhāñ hai be-ḳhabar

tishnagī kā ġhalġhala hai sāġharoñ ke darmiyāñ

bhiiḌ kī be-chehragī meñ haiñ ka.ī chehre nihāñ

chand sar vaale bhī haiñ in be-saroñ ke darmiyāñ

aao sab ik roz mil baiTheñ ye socheñ kyuuñ huī

is qadar bechārgī chāragaroñ ke darmiyāñ

hādsoñ ke shahr meñ ik hādsa ye bhī huā

ek shīsha aa gayā hai pattharoñ ke darmiyāñ

jā-e-hairat is na.ī tahzīb meñ maujūd hai

ik purānā sā khañDar ūñche gharoñ ke darmiyāñ

vo to bhārī paḌ gayā 'betāb' ik bichchhū kā Dañk

umr varna kaT chukī thī azdahoñ ke darmiyāñ

kuchh to hain paikar pareshan aazaron ke darmiyan

aur kuchh aazar pareshan pattharon ke darmiyan

sab KHabar hote hue pir-e-mughan hai be-KHabar

tishnagi ka ghalghala hai sagharon ke darmiyan

bhiD ki be-chehragi mein hain kai chehre nihan

chand sar wale bhi hain in be-saron ke darmiyan

aao sab ek roz mil baiThen ye sochen kyun hui

is qadar bechaargi chaaragaron ke darmiyan

hadson ke shahr mein ek hadsa ye bhi hua

ek shisha aa gaya hai pattharon ke darmiyan

ja-e-hairat is nai tahzib mein maujud hai

ek purana sa khanDar unche gharon ke darmiyan

wo to bhaari paD gaya 'betab' ek bichchhu ka Dank

umr warna kaT chuki thi azdahon ke darmiyan