kuchh to ho dard ki lazzat hi sahi

kuchh to ho dard kī lazzat hī sahī

terī ulfat meñ aziyyat hī sahī

dard ko dard na jab tū samjhe

bad-gumānī tirī aadat hī sahī

dil-e-mahjūr meñ armān-e-visāl

na sahī diid kī hasrat hī sahī

but-kada chhoḌne vaale to na the

ḳhair miltī hai to jannat hī sahī

dil ko thā ḳhaak meñ milnā so milā

dekhne vāloñ ko ibrat hī sahī

is sitamgār ne kar lī tauba

ai falak haañ koī aafat hī sahī

koī jalva nazar aa.e shāyad

TikTikī bañdhne kī aadat hī sahī

haiñ kisī jalve kī āñkheñ mushtāq

kuchh kam-o-besh ye ġhaflat hī sahī

ishq kī boltī tasvīr hai 'shauq'

dekhne vāloñ ko hairat hī sahī

kuchh to ho dard ki lazzat hi sahi

teri ulfat mein aziyyat hi sahi

dard ko dard na jab tu samjhe

bad-gumani teri aadat hi sahi

dil-e-mahjur mein arman-e-visal

na sahi did ki hasrat hi sahi

but-kada chhoDne wale to na the

KHair milti hai to jannat hi sahi

dil ko tha KHak mein milna so mila

dekhne walon ko ibrat hi sahi

is sitamgar ne kar li tauba

ai falak han koi aafat hi sahi

koi jalwa nazar aae shayad

TikTiki bandhne ki aadat hi sahi

hain kisi jalwe ki aankhen mushtaq

kuchh kam-o-besh ye ghaflat hi sahi

ishq ki bolti taswir hai 'shauq'

dekhne walon ko hairat hi sahi