kuchh to hota is se ziyaada tere baad judai mein

kuchh to hotā is se ziyāda tere baa'd judā.ī meñ

ek izāfa kyā hotā hai sadiyoñ kī tanhā.ī meñ

bhūle-bisre dard purāne milne aate haiñ ab aise

bilkul jaise phuul pakherū ujḌī sī añgnā.ī meñ

lahroñ ke sañg khel rahī thiiñ ujlī ujlī sī yādeñ

Duub gayā phir manzar saarā dariyā kī gahrā.ī meñ

kaisī udāsī gholtī jaa.e shaam Dhale purvā.ī meñ

kis kī chīḳheñ guuñj rahī haiñ duur vahāñ shahnā.ī meñ

apne hī dil kā dhyān aayā bojhal āñkhoñ ne jab dekhā

tanhā parinda uḌtā huā shab tāroñ kī parchhā.ī meñ

kuchh to hota is se ziyaada tere ba'd judai mein

ek izafa kya hota hai sadiyon ki tanhai mein

bhule-bisre dard purane milne aate hain ab aise

bilkul jaise phul pakheru ujDi si angnai mein

lahron ke sang khel rahi thin ujli ujli si yaaden

Dub gaya phir manzar sara dariya ki gahrai mein

kaisi udasi gholti jae sham Dhale purwai mein

kis ki chiKHen gunj rahi hain dur wahan shahnai mein

apne hi dil ka dhyan aaya bojhal aankhon ne jab dekha

tanha parinda uDta hua shab taron ki parchhai mein