kuchh to is dasht-e-gum-asar ki virani se

kuchh to is dasht-e-gum-āsār kī vīrānī se

kuchh to mar jā.eñge ham apnī pareshānī se

ek ḳheme kī tanābeñ kaTeñ vahshat ke sabab

ek ḳhanjar kī bujhī pyaas ḳhūñ-afshānī se

ik faqīr aaj bhī gardan ko uThātā hī nahīñ

jhuk ga.ī thī kisī hijrat pe pashemānī se

maiñ ki bichhḌā thā kisī shaḳhs se barsoñ pahle

tab se sahmā huuñ maiñ qudrat kī nigahbānī se

ab jo is shahr meñ aa.e to muqaddar jaano

ham mayassar kahāñ aate haiñ yuuñ āsānī se

ham husainī haiñ hameñ pyaas kī shiddat kaisī

surḳh-rū aaj bhī vaise hai lahū paanī se

aa hī jā.eñge adākārī ke kuchh Dhab 'āsif'

kaun bach saktā hai is 'ālam-e-insānī se

kuchh to is dasht-e-gum-asar ki virani se

kuchh to mar jaenge hum apni pareshani se

ek KHeme ki tanaben kaTen wahshat ke sabab

ek KHanjar ki bujhi pyas KHun-afshani se

ek faqir aaj bhi gardan ko uThata hi nahin

jhuk gai thi kisi hijrat pe pashemani se

main ki bichhDa tha kisi shaKHs se barson pahle

tab se sahma hun main qudrat ki nigahbani se

ab jo is shahr mein aae to muqaddar jaano

hum mayassar kahan aate hain yun aasani se

hum husaini hain hamein pyas ki shiddat kaisi

surKH-ru aaj bhi waise hai lahu pani se

aa hi jaenge adakari ke kuchh Dhab 'asif'

kaun bach sakta hai is 'alam-e-insani se