kuchh tum se shikayat thi na duniya se gila tha

kuchh tum se shikāyat thī na duniyā se gila thā

maiñ yūñhī zarā der ko ḳhāmosh huā thā

vo umr-e-gurezāñ ho ki ho terā tasavvur

saa.e kī tarah saath mire koī lagā thā

kyā jāniye kis vāste maslūb huā huuñ

duniyā meñ to bahutoñ ne tirā naam liyā thā

aa jaate na gar sāmne dariyā ke kināre

maiñ hijr-e-musalsal ko tire bhuul chalā thā

vo vaqt bhī guzrā hai ki jiddat ke junūñ meñ

maiñ apnī navāoñ kā galā ghoñT rahā thā

sab bhuul chukā maiñ to tirī yaad kā aalam

ye yaad hai ik bulbula paanī se uThā thā

kyā vo bhī 'sabā' mujh ko na pahchān sakegā

hairat se jo ā.īna mujhe dekh rahā thā

kuchh tum se shikayat thi na duniya se gila tha

main yunhi zara der ko KHamosh hua tha

wo umr-e-gurezan ho ki ho tera tasawwur

sae ki tarah sath mere koi laga tha

kya jaaniye kis waste maslub hua hun

duniya mein to bahuton ne tera nam liya tha

aa jate na gar samne dariya ke kinare

main hijr-e-musalsal ko tere bhul chala tha

wo waqt bhi guzra hai ki jiddat ke junun mein

main apni nawaon ka gala ghonT raha tha

sab bhul chuka main to teri yaad ka aalam

ye yaad hai ek bulbula pani se uTha tha

kya wo bhi 'saba' mujh ko na pahchan sakega

hairat se jo aaina mujhe dekh raha tha