kuchh yaad nahin kaise hunar bhul gae hain

kuchh yaad nahīñ kaise hunar bhuul ga.e haiñ

honā thā jinheñ shams-o-qamar bhuul ga.e haiñ

duniyā ke tamāshoñ ne kuchh uljhāyā hai aisā

kab shaam huī kab thī sahar bhuul ga.e haiñ

tum gaañv ke bargad kī ḳhabar pūchh rahe ho

ham apnī du'āoñ kā shajar bhuul ga.e haiñ

tum se koī ummīd kabhī thī na abhī hai

kuufe meñ jo aa.e haiñ to sar bhuul ga.e haiñ

dīvār meñ chunñe pe bhī kuchh log haiñ zinda

maanā ki unheñ ahl-e-nazar bhuul ga.e haiñ

kuchh yaad nahin kaise hunar bhul gae hain

hona tha jinhen shams-o-qamar bhul gae hain

duniya ke tamashon ne kuchh uljhaya hai aisa

kab sham hui kab thi sahar bhul gae hain

tum ganw ke bargad ki KHabar puchh rahe ho

hum apni du'aon ka shajar bhul gae hain

tum se koi ummid kabhi thi na abhi hai

kufe mein jo aae hain to sar bhul gae hain

diwar mein chunne pe bhi kuchh log hain zinda

mana ki unhen ahl-e-nazar bhul gae hain