kuchh yaqin rahne diya kuchh wahima rahne diya

kuchh yaqīñ rahne diyā kuchh vāhima rahne diyā

soch kī dīvār meñ ik dar khulā rahne diyā

kashtiyāñ saarī jalā Dālīñ anā kī jañg meñ

maiñ ne bhī kab vāpsī kā rāsta rahne diyā

maiñ ne har ilzām apne sar liyā is shahr meñ

bā-vafā logoñ meñ ḳhud ko bevafā rahne diyā

ek nisbat ek rishta ek hī ghar ke makīñ

vaqt ne donoñ meñ lekin fāsla rahne diyā

jāgtī āñkhoñ meñ kaise ḳhvāb kī ta.abīr thī

umr bhar jis ne kisī ko sochtā rahne diyā

ek saa.e kā ta.āqub kar rahā huuñ aaj tak

ḳhud ko kaisī ibtilā meñ mubtalā rahne diyā

vo mirī rāhoñ meñ dīvāreñ khaḌī kartā rahā

maiñ ne hoñToñ par faqat harf-e-duā rahne diyā

pyaar meñ ab naf.a o nuqsān kā kyā sochnā

kyā diyā us ko aur apne paas kyā rahne diyā

apnī kuchh bāteñ dar-e-iz.hār tak aane na diiñ

band kamre hī meñ dil ko chīḳhtā rahne diyā

phir na dastak de sakā 'āfāq' koī us ke ba.ad

naam us kā dil kī taḳhtī par likhā rahne diyā

kuchh yaqin rahne diya kuchh wahima rahne diya

soch ki diwar mein ek dar khula rahne diya

kashtiyan sari jala Dalin ana ki jang mein

main ne bhi kab wapsi ka rasta rahne diya

main ne har ilzam apne sar liya is shahr mein

ba-wafa logon mein KHud ko bewafa rahne diya

ek nisbat ek rishta ek hi ghar ke makin

waqt ne donon mein lekin fasla rahne diya

jagti aankhon mein kaise KHwab ki tabir thi

umr bhar jis ne kisi ko sochta rahne diya

ek sae ka taaqub kar raha hun aaj tak

KHud ko kaisi ibtila mein mubtala rahne diya

wo meri rahon mein diwaren khaDi karta raha

main ne honTon par faqat harf-e-dua rahne diya

pyar mein ab nafa o nuqsan ka kya sochna

kya diya us ko aur apne pas kya rahne diya

apni kuchh baaten dar-e-izhaar tak aane na din

band kamre hi mein dil ko chiKHta rahne diya

phir na dastak de saka 'afaq' koi us ke baad

nam us ka dil ki taKHti par likha rahne diya