kuchh yun main apne aap se kaTta chala gaya

kuchh yuuñ maiñ apne aap se kaTtā chalā gayā

bas ḳhāl-o-ḳhad se rah ga.e chehra chalā gayā

afsāna mere jehd kā itnā sā thā ki maiñ

andesha-e-yaqīn se laḌtā chalā gayā

aaya nahīñ palaT ke ujālā kabhī yahāñ

hālāñki ghar se kab kā añdherā chalā gayā

bhauñre niDar the koh-e-haqīqat se jā laḌe

maiñ sāya-e-sarāb se Dartā chalā gayā

jis jā kiyā zarā sā kabhī niyyat-e-qiyām

us jā ke peḌ peḌ kā saaya chalā gayā

ik lau kā rūd-ḳhāna-e-muztar sā huuñ magar

chup-chāp dasht-e-karb meñ bahtā chalā gayā

yuuñ mubtalā-e-ḳhauf thā mujh se adū mirā

lāshe pe mere tiir chalātā chalā gayā

duniyā ulajh ke rah ga.ī hirs-o-havas ke gird

'mansūr' kaif-e-vajd meñ chaltā chalā gayā

kuchh yun main apne aap se kaTta chala gaya

bas KHal-o-KHad se rah gae chehra chala gaya

afsana mere jehd ka itna sa tha ki main

andesha-e-yaqin se laDta chala gaya

aaya nahin palaT ke ujala kabhi yahan

haalanki ghar se kab ka andhera chala gaya

bhaunre niDar the koh-e-haqiqat se ja laDe

main saya-e-sarab se Darta chala gaya

jis ja kiya zara sa kabhi niyyat-e-qiyam

us ja ke peD peD ka saya chala gaya

ek lau ka rud-KHana-e-muztar sa hun magar

chup-chap dasht-e-karb mein bahta chala gaya

yun mubtala-e-KHauf tha mujh se adu mera

lashe pe mere tir chalata chala gaya

duniya ulajh ke rah gai hirs-o-hawas ke gird

'mansur' kaif-e-wajd mein chalta chala gaya