kuchh zabt kiya hai to kabhi dil mein Thani hai

kuchh zabt kiyā hai to kabhī dil meñ Thanī hai

mardān-e-sitam-pesha se kab baat banī hai

kuchh kahne pe aa jā.ūñ to kyā kah nahīñ saktā

had-darja pur-asrār mirī kam-suḳhanī hai

achchhā hai na ḳhātir meñ mujhe laa.e zamāna

kirdār-shikan maiñ huuñ na ḳhush-pairahanī hai

mumkin nahīñ duniyā meñ har ik qalb kī tasḳhīr

logoñ kī nigāhoñ meñ ye ḳhātir-shikanī hai

tum merī pareshān-ḳhayālī pe na jaao

har chand pur-afgār sahī dil to ġhanī hai

āsār nazar aate haiñ vahshat-zadagī ke

kahne ko ye ābādī ba-tadrīj ghanī hai

huuñ ḳhūgar-e-idrāk qadam kis se milā.ūñ

'hāmid' mire hisse meñ faqat saf-shikanī hai

kuchh zabt kiya hai to kabhi dil mein Thani hai

mardan-e-sitam-pesha se kab baat bani hai

kuchh kahne pe aa jaun to kya kah nahin sakta

had-darja pur-asrar meri kam-suKHani hai

achchha hai na KHatir mein mujhe lae zamana

kirdar-shikan main hun na KHush-pairahani hai

mumkin nahin duniya mein har ek qalb ki tasKHir

logon ki nigahon mein ye KHatir-shikani hai

tum meri pareshan-KHayali pe na jao

har chand pur-afgar sahi dil to ghani hai

aasar nazar aate hain wahshat-zadagi ke

kahne ko ye aabaadi ba-tadrij ghani hai

hun KHugar-e-idrak qadam kis se milaun

'hamid' mere hisse mein faqat saf-shikani hai