kuchh zindagi mein ishq-o-wafa ka hunar bhi rakh

kuchh zindagī meñ ishq-o-vafā kā hunar bhī rakh

rishta ḳhushī se joḌ ġham-e-mo'tabar meñ rakh

shahroñ meñ zindagī kā safar ab muhāl hai

behtar to ye hai sahrā pe apnī nazar bhī rakh

duniyā ke hādsāt se bhī rakh tū vāsta

hālāt ghar ke kaise haiñ is kī ḳhabar bhī rakh

talvār hī se fat.h to miltī nahīñ kabhī

nādān pahle apnī hathelī pe sar bhī rakh

ummīd us ke rahm-o-karam kī bhī rakh zarūr

dāman ko apne ashk-e-nadāmat se tar bhī rakh

gar zindagī meñ chāhtā hai sar-bulandiyāñ

pahle kisī faqīr ke qadmoñ pe sar bhī rakh

gar aarzū hai tujh ko mile manzil-e-hayāt

is aarzū meñ ḳhud ko to mahv-e-safar bhī rakh

is dilkashī meñ chāñd kī ḳhud ko na bhuul jā

apnī nazar meñ jalva-e-shaqqul-qamar bhī rakh

shāhoñ ke dar pe jaane se maiñ roktā nahīñ

lekin tū ḳhānqāhoñ meñ apnā guzar bhī rakh

dānoñ ke vāste tū zamīñ par bhī aa 'azīz'

har-chand āsmānoñ pe tū apnā ghar bhī rakh

kuchh zindagi mein ishq-o-wafa ka hunar bhi rakh

rishta KHushi se joD gham-e-mo'tabar mein rakh

shahron mein zindagi ka safar ab muhaal hai

behtar to ye hai sahra pe apni nazar bhi rakh

duniya ke hadsat se bhi rakh tu wasta

haalat ghar ke kaise hain is ki KHabar bhi rakh

talwar hi se fath to milti nahin kabhi

nadan pahle apni hatheli pe sar bhi rakh

ummid us ke rahm-o-karam ki bhi rakh zarur

daman ko apne ashk-e-nadamat se tar bhi rakh

gar zindagi mein chahta hai sar-bulandiyan

pahle kisi faqir ke qadmon pe sar bhi rakh

gar aarzu hai tujh ko mile manzil-e-hayat

is aarzu mein KHud ko to mahw-e-safar bhi rakh

is dilkashi mein chand ki KHud ko na bhul ja

apni nazar mein jalwa-e-shaqqul-qamar bhi rakh

shahon ke dar pe jaane se main rokta nahin

lekin tu KHanqahon mein apna guzar bhi rakh

danon ke waste tu zamin par bhi aa 'aziz'

har-chand aasmanon pe tu apna ghar bhi rakh