kuchla kiye hain kitne hi lashkar zamin ko

kuchlā kiye haiñ kitne hī lashkar zamīn ko

aise kiyā gayā hai barābar zamīn ko

maiñ ne bhī sair kī hai kabhī āsmān kī

maiñ jāntā huuñ dasht samundar zamīn ko

pairoñ se dhīre dhīre khisakne lagī hai ab

kab tak rakhūñ maiñ yaar pakaḌ kar zamīn ko

jab bhī thakan se chuur huā so gayā huuñ maiñ

chādar falak ko maan ke bistar zamīn ko

mujh ko libās-e-rūh alag se 'atā huā

dafnā diyā gayā mire andar zamīn ko

pātāl meñ paḌā huuñ magar pur-sukūn huuñ

maiñ jhāñktā rahā huuñ uchhal kar zamīn ko

daldal ko paar karnā hai 'ārif' aur us ke baa'd

rakh deñge tere sāmne lā kar zamīn ko

kuchla kiye hain kitne hi lashkar zamin ko

aise kiya gaya hai barabar zamin ko

main ne bhi sair ki hai kabhi aasman ki

main jaanta hun dasht samundar zamin ko

pairon se dhire dhire khisakne lagi hai ab

kab tak rakhun main yar pakaD kar zamin ko

jab bhi thakan se chur hua so gaya hun main

chadar falak ko man ke bistar zamin ko

mujh ko libas-e-ruh alag se 'ata hua

dafna diya gaya mere andar zamin ko

patal mein paDa hun magar pur-sukun hun

main jhankta raha hun uchhal kar zamin ko

daldal ko par karna hai 'arif' aur us ke ba'd

rakh denge tere samne la kar zamin ko