kufr se kuchh kaam hai hum ko na iman se gharaz

kufr se kuchh kaam hai ham ko na īmāñ se ġharaz

hai to bas apnī ḳhayālāt-e-pareshāñ se ġharaz

josh-e-vahshat meñ nahīñ sair-e-gulistāñ se ġharaz

hai mire dast-e-junūñ ko jeb-o-dāmāñ se ġharaz

qaid se taḳhsīs kī āzād hai saudā-e-ishq

ham ko matlab hai bayābāñ se na zindāñ se ġharaz

mashġhala achchhā hujūm-e-ġham meñ haath aaya mire

kaam hai lab ko fuġhāñ se dil ko hirmāñ se ġharaz

ai havā-e-jazb-e-dil imdād karnā chāhiye

misr vāloñ ko nahīñ hai pīr-e-kan.āñ se ġharaz

aish-o-ishrat se jinheñ dam-bhar ko bhī fursat nahīñ

ḳhaak ho un ko mire hāl-e-pareshāñ se ġharaz

munhasir jab maut par kambaḳht kī hai zindagī

ho marīz-e-ġham ko terī ḳhāk-e-darmāñ se ġharaz

āshiqoñ kā maz.hab-o-millat judā īmāñ judā

sab se begāne haiñ kyā gabr-o-musalmāñ se ġharaz

kaam sehat se na hai kuchh chārāgar kī ehtiyāj

lazzat-e-zaḳhm-e-jigar ko hai namak-dāñ se ġharaz

bahr-e-ālam meñ pahuñchnā tā-ba-sāhil hai zarūr

kashtī-e-umr-e-ravāñ ko kab hai tūfāñ se ġharaz

kūcha-e-jānāñ mayassar ham ko ho 'mas.ūd' agar

chhoḌ kar us ko na rakkheñ bāġh-e-rizvāñ se ġharaz

kufr se kuchh kaam hai hum ko na iman se gharaz

hai to bas apni KHayalat-e-pareshan se gharaz

josh-e-wahshat mein nahin sair-e-gulistan se gharaz

hai mere dast-e-junun ko jeb-o-daman se gharaz

qaid se taKHsis ki aazad hai sauda-e-ishq

hum ko matlab hai bayaban se na zindan se gharaz

mashghala achchha hujum-e-gham mein hath aaya mere

kaam hai lab ko fughan se dil ko hirman se gharaz

ai hawa-e-jazb-e-dil imdad karna chahiye

misr walon ko nahin hai pir-e-kanan se gharaz

aish-o-ishrat se jinhen dam-bhar ko bhi fursat nahin

KHak ho un ko mere haal-e-pareshan se gharaz

munhasir jab maut par kambaKHt ki hai zindagi

ho mariz-e-gham ko teri KHak-e-darman se gharaz

aashiqon ka mazhab-o-millat juda iman juda

sab se begane hain kya gabr-o-musalman se gharaz

kaam sehat se na hai kuchh chaaragar ki ehtiyaj

lazzat-e-zaKHm-e-jigar ko hai namak-dan se gharaz

bahr-e-alam mein pahunchna ta-ba-sahil hai zarur

kashti-e-umr-e-rawan ko kab hai tufan se gharaz

kucha-e-jaanan mayassar hum ko ho 'masud' agar

chhoD kar us ko na rakkhen bagh-e-rizwan se gharaz