kulal-e-gardun agar jahan mein jo KHak meri ka jam karta

kulāl-e-gardūñ agar jahāñ meñ jo ḳhaak merī kā jaam kartā

to maiñ sanam ke laboñ se mil kar ajab hī aish-e-mudām kartā

jo paatā lazzat bisān-e-mastāñ mai-e-mohabbat se terī zāhid

to ḳhānqa se nikal ke apnī vo mai-kade meñ qayām kartā

vo bazm apnī thī mai-kashī kī farishte ho jaate mast-o-be-ḳhud

jo shaiḳh jī vaañ se bach ke aate to phir maiñ un ko salām kartā

jo zulfeñ mukhḌe pe khol detā sanam hamārā to phir ye gardūñ

na din dikhātā na shab batātā na sub.h laatā na shaam kartā

vo bazm apnī thī mai-ḳhorī kī farishte ho jaate mast-o-be-ḳhud

jo shaiḳh jī bach ke vaañ se aate to maiñ phir un ko salām kartā

'nazīr' āḳhir ko haar kar maiñ galī meñ us kī gayā thā bikne

tamāshā hotā jo mujh ko le kar vo shoḳh apnā ġhulām kartā

kulal-e-gardun agar jahan mein jo KHak meri ka jam karta

to main sanam ke labon se mil kar ajab hi aish-e-mudam karta

jo pata lazzat bisan-e-mastan mai-e-mohabbat se teri zahid

to KHanqa se nikal ke apni wo mai-kade mein qayam karta

wo bazm apni thi mai-kashi ki farishte ho jate mast-o-be-KHud

jo shaiKH ji wan se bach ke aate to phir main un ko salam karta

jo zulfen mukhDe pe khol deta sanam hamara to phir ye gardun

na din dikhata na shab batata na subh lata na sham karta

wo bazm apni thi mai-KHori ki farishte ho jate mast-o-be-KHud

jo shaiKH ji bach ke wan se aate to main phir un ko salam karta

'nazir' aaKHir ko haar kar main gali mein us ki gaya tha bikne

tamasha hota jo mujh ko le kar wo shoKH apna ghulam karta