kurra-e-nur ka bashinda mujhe dekhta hai

kurra-e-nūr kā bāshinda mujhe dekhtā hai

sub.h-e-nauroz huuñ joinda mujhe dekhtā hai

us kī duniyā se kisī taur nahīñ bantī mirī

aur vo hai ki numā.inda mujhe dekhtā hai

mujh ko āhang-o-tavāzun ke hunar aate haiñ

raqs kartā huuñ to sāzinda mujhe dekhtā hai

maiñ huuñ taslīm ke raste meñ baġhāvat kā charāġh

zulm har taaq meñ tābinda mujhe dekhtā hai

ishq huuñ aur numū kartī huī ḳhaak se huuñ

ya.anī har shaḳhs hī ā.inda mujhe dekhtā hai

merī tārīḳh kā māḳhaz mirī dānā.ī hai

vaqt har daur meñ pā.inda mujhe dekhtā hai

maiñ ne tahzīb kī miTTī meñ yaqīñ boyā thā

phuul khilte haiñ to kārinda mujhe dekhtā hai

apnī dānist meñ chūmā thā koī āb-fishār

chashmak-e-nam se vo sharminda mujhe dekhtā hai

kis ne māhaul pe chhiḌkā hai mirā sabr 'munīr'

mar bhī jā.ūñ to jahāñ zinda mujhe dekhtā hai

kurra-e-nur ka bashinda mujhe dekhta hai

subh-e-nauroz hun joinda mujhe dekhta hai

us ki duniya se kisi taur nahin banti meri

aur wo hai ki numainda mujhe dekhta hai

mujh ko aahang-o-tawazun ke hunar aate hain

raqs karta hun to sazinda mujhe dekhta hai

main hun taslim ke raste mein baghawat ka charagh

zulm har taq mein tabinda mujhe dekhta hai

ishq hun aur numu karti hui KHak se hun

yani har shaKHs hi aainda mujhe dekhta hai

meri tariKH ka maKHaz meri danai hai

waqt har daur mein painda mujhe dekhta hai

main ne tahzib ki miTTi mein yaqin boya tha

phul khilte hain to karinda mujhe dekhta hai

apni danist mein chuma tha koi aab-fishaar

chashmak-e-nam se wo sharminda mujhe dekhta hai

kis ne mahaul pe chhiDka hai mera sabr 'munir'

mar bhi jaun to jahan zinda mujhe dekhta hai