ku-e-jaanan mein nahin koi guzar ki surat

kū-e-jānāñ meñ nahīñ koī guzar kī sūrat

dil uḌā phirtā hai TuuTe hue par kī sūrat

ham to manzil ke talabgār the lekin manzil

aage baḌhtī hī ga.ī rāhguzar kī sūrat

vo raheñ sāmne mere to tasallī varna

dil bhī kambaḳht bhaTaktā hai nazar kī sūrat

ruuh afsurda pareshān ḳhayālāt meñ gum

aisī pahle kabhī dekhī thī bashar kī sūrat

merī qismat meñ mohabbat ne yahī likkhā hai

dard bhī dil meñ rahe zaḳhm-e-jigar kī sūrat

baiTh jaa.eñ kisī goshe meñ simaT kar ai dost

kaun gardish meñ rahe shams-o-qamar kī sūrat

vo ga.e ghar se to phir ham ne bhī ghar ko chhoḌā

ham se dekhī ga.ī dīvār na dar kī sūrat

chand aañsū hī mire dil pe 'falak' gir jaa.eñ

ātish-e-ġham se sulagtā hai sharar kī sūrat

ku-e-jaanan mein nahin koi guzar ki surat

dil uDa phirta hai TuTe hue par ki surat

hum to manzil ke talabgar the lekin manzil

aage baDhti hi gai rahguzar ki surat

wo rahen samne mere to tasalli warna

dil bhi kambaKHt bhaTakta hai nazar ki surat

ruh afsurda pareshan KHayalat mein gum

aisi pahle kabhi dekhi thi bashar ki surat

meri qismat mein mohabbat ne yahi likkha hai

dard bhi dil mein rahe zaKHm-e-jigar ki surat

baiTh jaen kisi goshe mein simaT kar ai dost

kaun gardish mein rahe shams-o-qamar ki surat

wo gae ghar se to phir hum ne bhi ghar ko chhoDa

hum se dekhi gai diwar na dar ki surat

chand aansu hi mere dil pe 'falak' gir jaen

aatish-e-gham se sulagta hai sharar ki surat