kuche se nikalwate ho abas hum aise watan-awaron ko

kūche se nikalvāte ho abas ham aise vatan-āvāroñ ko

rahne do paḌe haiñ ek taraf dukh dete ho kyuuñ be-chāroñ ko

rogī jo tumhāre ishq ke haiñ jiite haiñ tumhārī aas pe vo

do chaar dinoñ pe ḳhudā ke liye dekhā to karo bīmāroñ ko

ham-shakl kisī mizhgāñ ke jo the to dil meñ hamāre chubhnā thā

afsos ki ai sahrā-e-junūñ chubhnā bhī na aayā ḳhāroñ ko

har shahr meñ hai sannāTā sā har kūche meñ ḳhaak uḌtī hai

jis din se tire dīvānoñ ne ābād kiyā kohsāroñ ko

thoḌī sī rahī hai raat 'ziyā' kuchh maañg duā.eñ ḳhāliq se

behtar hai isī meñ ho jo sahar phir shaam se ginnā tāroñ ko

kuche se nikalwate ho abas hum aise watan-awaron ko

rahne do paDe hain ek taraf dukh dete ho kyun be-chaaron ko

rogi jo tumhaare ishq ke hain jite hain tumhaari aas pe wo

do chaar dinon pe KHuda ke liye dekha to karo bimaron ko

ham-shakl kisi mizhgan ke jo the to dil mein hamare chubhna tha

afsos ki ai sahra-e-junun chubhna bhi na aaya KHaron ko

har shahr mein hai sannaTa sa har kuche mein KHak uDti hai

jis din se tere diwanon ne aabaad kiya kohsaron ko

thoDi si rahi hai raat 'ziya' kuchh mang duaen KHaliq se

behtar hai isi mein ho jo sahar phir sham se ginna taron ko