kuza-gar main tere kis KHwab ka chehra ho jaun

kūza-gar maiñ tire kis ḳhvāb kā chehra ho jā.ūñ

ek hī jism kī mohlat hai maiñ kyā kyā ho jā.ūñ

tujh meñ aur mujh meñ bas ik farq vafā hī kā hai

maiñ agar tark-e-vafā kar duuñ to tujh sā ho jā.ūñ

chaar din qaid meñ rah kar ye tamanna bhī ga.ī

pahle lagtā thā ki ai kaash parinda ho jā.ūñ

mujh ko mere hī añdhere ne chhupā rakkhā hai

jo tirī zaat meñ aa jā.ūñ sitāra ho jā.ūñ

jī lagā rakkhā hai roz ek tamāsha kar ke

ḳhud ko masrūf na rakkhūñ to akelā ho jā.ūñ

sochte sab haiñ kahānī to mukammal ho jaa.e

chāhtā koī nahīñ hai ki maiñ us kā ho jā.ūñ

maiñ to bas ek tasavvur huuñ vahī rahne de

aise bhī soch na mujh ko ki maiñ chehra ho jā.ūñ

sab kī āñkhoñ meñ khaTaktī hai hamārī qurbat

shahr kā shahr lagā hai ki akelā ho jā.ūñ

'ishq meñ saarā kamāl asl meñ furqat kā hai

jo bhī ho jaa.e judā mujh se maiñ us kā ho jā.ūñ

kuza-gar main tere kis KHwab ka chehra ho jaun

ek hi jism ki mohlat hai main kya kya ho jaun

tujh mein aur mujh mein bas ek farq wafa hi ka hai

main agar tark-e-wafa kar dun to tujh sa ho jaun

chaar din qaid mein rah kar ye tamanna bhi gai

pahle lagta tha ki ai kash parinda ho jaun

mujh ko mere hi andhere ne chhupa rakkha hai

jo teri zat mein aa jaun sitara ho jaun

ji laga rakkha hai roz ek tamasha kar ke

KHud ko masruf na rakkhun to akela ho jaun

sochte sab hain kahani to mukammal ho jae

chahta koi nahin hai ki main us ka ho jaun

main to bas ek tasawwur hun wahi rahne de

aise bhi soch na mujh ko ki main chehra ho jaun

sab ki aankhon mein khaTakti hai hamari qurbat

shahr ka shahr laga hai ki akela ho jaun

'ishq mein sara kamal asl mein furqat ka hai

jo bhi ho jae juda mujh se main us ka ho jaun