kya ahd-e-nau mein apni pahchan dekhta hun

kyā ahd-e-nau meñ apnī pahchān dekhtā huuñ

aksar ba-shakl-e-insāñ haivān dekhtā huuñ

ḳhvāboñ ko, justujū ko, rakhnā abhī safar meñ

kuchh duur chal ke rāheñ āsān dekhtā huuñ

raftār-e-vaqt tū ne paa.ī hai kaisī ujlat

jazboñ meñ asr-e-nau ke haijān dekhtā huuñ

aa.ī hai ḳhāk-e-hastī uTh kar kahāñ se apnī

ḳhvāboñ meñ kuchh jazīre anjān dekhtā huuñ

amn-o-amāñ kī bāteñ shāyad haiñ sirf bāteñ

arz-e-ḳhudā pe har din ghamsān dekhtā huuñ

jab justujū na manzil aur ḳhvāb haiñ na armāñ

phir kis liye safar kā sāmān dekhtā huuñ

tabdīl ho ga.ī haiñ aqdār-e-kohna yuuñ bhī

ye kā.enāt saarī hairān dekhtā huuñ

merī nigāh āḳhir hassās kyuuñ hai utnī

maiñ roz-o-shab badalte insān dekhtā huuñ

detī hai jab bhī fursat kuchh gardish-e-zamāna

rishtoñ meñ apnī baaqī pahchān dekhtā huuñ

guzre the jis meñ lamha bachpan ke qahqahoñ meñ

ḳhvāboñ meñ vo havelī vīrān dekhtā huuñ

kya ahd-e-nau mein apni pahchan dekhta hun

aksar ba-shakl-e-insan haiwan dekhta hun

KHwabon ko, justuju ko, rakhna abhi safar mein

kuchh dur chal ke rahen aasan dekhta hun

raftar-e-waqt tu ne pai hai kaisi ujlat

jazbon mein asr-e-nau ke haijaan dekhta hun

aai hai KHak-e-hasti uTh kar kahan se apni

KHwabon mein kuchh jazire anjaan dekhta hun

amn-o-aman ki baaten shayad hain sirf baaten

arz-e-KHuda pe har din ghamsan dekhta hun

jab justuju na manzil aur KHwab hain na arman

phir kis liye safar ka saman dekhta hun

tabdil ho gai hain aqdar-e-kohna yun bhi

ye kaenat sari hairan dekhta hun

meri nigah aaKHir hassas kyun hai utni

main roz-o-shab badalte insan dekhta hun

deti hai jab bhi fursat kuchh gardish-e-zamana

rishton mein apni baqi pahchan dekhta hun

guzre the jis mein lamha bachpan ke qahqahon mein

KHwabon mein wo haweli viran dekhta hun