kya bataun aaj wo mujhse juda kyunkar hua

kyā batā.ūñ aaj vo mujh se judā kyūñkar huā

muddatoñ kā āshnā nā-āshnā kyūñkar huā

tere har naqsh-e-qadam par jis ne sajda kar diyā

terī nazroñ meñ bhalā vo bevafā kyūñkar huā

merī barbādī meñ jis kā haath thā vo fitna-gar

pūchhtā hai ab mujhe ye hādisa kyūñkar huā

jis ke hāthoñ ne jalāyā gulsitāñ kā gulsitāñ

is kā ghar bhī jal gayā to phir burā kyūñkar huā

aadmī to aadmī kā thā sharīk-e-ranj-o-ġham

munqata.a phir āj-kal ye silsilā kyūñkar huā

jis kī rahmat chand logoñ ke liye maḳhsūs ho

hogā kuchh logoñ kā vo sab kā ḳhudā kyūñkar huā

jab tirī nazreñ lagī haiñ kausar-o-tasnīm par

phir batā shaiḳh-e-haram tū pārsā kyūñkar huā

daar par laTkā diye jaate haiñ haq-go ai 'shafaq'

haq ko haq kahne kā tujh ko hauslā kyūñkar huā

kya bataun aaj wo mujh se juda kyunkar hua

muddaton ka aashna na-ashna kyunkar hua

tere har naqsh-e-qadam par jis ne sajda kar diya

teri nazron mein bhala wo bewafa kyunkar hua

meri barbaadi mein jis ka hath tha wo fitna-gar

puchhta hai ab mujhe ye hadisa kyunkar hua

jis ke hathon ne jalaya gulsitan ka gulsitan

is ka ghar bhi jal gaya to phir bura kyunkar hua

aadmi to aadmi ka tha sharik-e-ranj-o-gham

munqata phir aaj-kal ye silsila kyunkar hua

jis ki rahmat chand logon ke liye maKHsus ho

hoga kuchh logon ka wo sab ka KHuda kyunkar hua

jab teri nazren lagi hain kausar-o-tasnim par

phir bata shaiKH-e-haram tu parsa kyunkar hua

dar par laTka diye jate hain haq-go ai 'shafaq'

haq ko haq kahne ka tujh ko hausla kyunkar hua