kya batlaen yaad nahin kab ishq ke hum bimar hue

kyā batlā.eñ yaad nahīñ kab ishq ke ham bīmār hue

aisā lage hai arsa guzrā ham ko ye āzār hue

aap kā shikva aap se karnā jū-e-shīr kā laanā hai

aap ke sāmne bolūñ kaise aap mirī sarkār hue

tiir kī tarah kirneñ barsīñ sub.h nikalte sūraj kī

lahūluhān thā saarā chehra niiñd se jab bedār hue

adl kī to zanjīr hilāne ham bhī ga.e darvāze tak

haath magar zanjīr na aa.ī ma.atūb-e-darbār hue

jo bhī zaḳhm liye the dil par ham ne un kī chāhat meñ

un se kah denā vo saare zaḳhm gul-o-gulzār hue

'mīr' kā to ahvāl paḌhā hai kyā 'nusrat' tum bhuul ga.e

ye nagrī hai ishq kī nagrī kyā kyā sayyad ḳhvār hue

kya batlaen yaad nahin kab ishq ke hum bimar hue

aisa lage hai arsa guzra hum ko ye aazar hue

aap ka shikwa aap se karna ju-e-shir ka lana hai

aap ke samne bolun kaise aap meri sarkar hue

tir ki tarah kirnen barsin subh nikalte suraj ki

lahuluhan tha sara chehra nind se jab bedar hue

adl ki to zanjir hilane hum bhi gae darwaze tak

hath magar zanjir na aai matub-e-darbar hue

jo bhi zaKHm liye the dil par hum ne un ki chahat mein

un se kah dena wo sare zaKHm gul-o-gulzar hue

'mir' ka to ahwal paDha hai kya 'nusrat' tum bhul gae

ye nagri hai ishq ki nagri kya kya sayyad KHwar hue