kya chamke ab faqat meri nale ki shaeri

kyā chamke ab faqat mirī naale kī shā.erī

is ahd meñ hai teġh kī bhāle kī shā.erī

sāmān sab tarah kā ho laḌne kā jin ke paas

hai aaj kal unhīñ kī masāle kī shā.erī

shā.er risāla-dār na dekhe na maiñ sune

ījād hai unheñ kā risāle kī shā.erī

mard-e-galīm-posh ko yaañ pūchhtā hai kaun

gar garm hai to shaal doshāle kī shā.erī

ye sher garm garm paḌhe jaate yuuñ nahīñ

muñh boltī hai garm nivāle kī shā.erī

naḳhra bhī sher meñ ho to haañ 'soz' kā sā ho

kis kaam kī vagarna chhināle kī shā.erī

dīvān jin ke kafsh se afzūñ nahīñ zarā

karte haiñ kyā vo log kasāle kī shā.erī

chūne ke kāġhazoñ pe jhaḌeñ haiñ jo apne sher

ya.anī ki aa rahī hai divāle kī shā.erī

kaisā hī baḌh chale vo kalām-e-sharīf par

sarsabz ho kabhī na rizāle kī shā.erī

ba.azoñ ne tab to sher pe 'hasrat' ke yuuñ kahā

kyā dāl-mūTh bechne vaale kī shā.erī

huuñ 'mus.hafī' maiñ tājir-e-mulk-e-suḳhan ki hai

'ḳhusro' kī tarah yaañ bhī aTāle kī shā.erī

kya chamke ab faqat meri nale ki shaeri

is ahd mein hai tegh ki bhaale ki shaeri

saman sab tarah ka ho laDne ka jin ke pas

hai aaj kal unhin ki masale ki shaeri

shaer risala-dar na dekhe na main sune

ijad hai unhen ka risale ki shaeri

mard-e-galim-posh ko yan puchhta hai kaun

gar garm hai to shaal doshaale ki shaeri

ye sher garm garm paDhe jate yun nahin

munh bolti hai garm niwale ki shaeri

naKHra bhi sher mein ho to han 'soz' ka sa ho

kis kaam ki wagarna chhinale ki shaeri

diwan jin ke kafsh se afzun nahin zara

karte hain kya wo log kasale ki shaeri

chune ke kaghazon pe jhaDen hain jo apne sher

yani ki aa rahi hai diwale ki shaeri

kaisa hi baDh chale wo kalam-e-sharif par

sarsabz ho kabhi na rizale ki shaeri

bazon ne tab to sher pe 'hasrat' ke yun kaha

kya dal-muTh bechne wale ki shaeri

hun 'mushafi' main tajir-e-mulk-e-suKHan ki hai

'KHusro' ki tarah yan bhi aTale ki shaeri