kya dam-e-naza koi aur tamanna karte

kyā dam-e-naz.a koī aur tamanna karte

jab talak dam na nikaltā use dekhā karte

dard-e-dūrī kā ba-juz marg nahīñ koī ilaaj

aise bīmār kī ham koī davā kyā karte

aise bhūle ki kabhī phir ke na pūchhā tum ne

kuchh to ai rāhat-e-jāñ paas vafā kā karte

jaur sab ham ne sahe jitne kiye gardūñ ne

dūrī-e-yār ko kis tarah gavāra karte

chashm-e-maḳhmūr se be-ḳhud jo na ho jaate ham

dil ko ātish-kada aur chashm ko dariyā karte

kar ke bismil jo hameñ chhoḌ diyā qātil ne

ham taḌapte ki use dekhte kyā kyā karte

vo ayādat ko 'haqīr' aap kī aate jo kabhī

karte ehsān agar aap ko achchhā karte

kya dam-e-naza koi aur tamanna karte

jab talak dam na nikalta use dekha karte

dard-e-duri ka ba-juz marg nahin koi ilaj

aise bimar ki hum koi dawa kya karte

aise bhule ki kabhi phir ke na puchha tum ne

kuchh to ai rahat-e-jaan pas wafa ka karte

jaur sab hum ne sahe jitne kiye gardun ne

duri-e-yar ko kis tarah gawara karte

chashm-e-maKHmur se be-KHud jo na ho jate hum

dil ko aatish-kada aur chashm ko dariya karte

kar ke bismil jo hamein chhoD diya qatil ne

hum taDapte ki use dekhte kya kya karte

wo ayaadat ko 'haqir' aap ki aate jo kabhi

karte ehsan agar aap ko achchha karte