kya dikha sakta hai koi moajize assi karoD

kyā dikhā saktā hai koī mo.ajize assī karoḌ

kyā kabhī hal ho sakeñge mas.ale assī karoḌ

sochiye kyūñkar kaTegā vaqt kā lambā safar

rahnumā koī nahīñ aur qāfile assī karoḌ

koī bhī aañsū tumhāre poñchhne vaalā nahīñ

kahne ko maañ haiñ tumhāre lāDle assī karoḌ

us ke hoñToñ par jagānā hai masarrat kī lakīr

jis ke siine meñ nihāñ haiñ aable assī karoḌ

ek ke ba.ad ek raste meñ guzarne ke liye

muntazir baiThe hue haiñ hādse assī karoḌ

muḳhtalif andāz ke haiñ muḳhtalif lahjoñ meñ haiñ

ik kitāb-e-zindagī ke tarjume assī karoḌ

dekhiye kab ḳhatm ho ghuT ghuT ke jiine kī sazā

ek rassī bhuuk kī hai aur gale assī karoḌ

ḳhud hī 'kāzim' rakh diye ham ne jilā ke vāste

chand fan-kāroñ ke aage aa.ine assī karoḌ

kya dikha sakta hai koi moajize assi karoD

kya kabhi hal ho sakenge masale assi karoD

sochiye kyunkar kaTega waqt ka lamba safar

rahnuma koi nahin aur qafile assi karoD

koi bhi aansu tumhaare ponchhne wala nahin

kahne ko man hain tumhaare laDle assi karoD

us ke honTon par jagana hai masarrat ki lakir

jis ke sine mein nihan hain aable assi karoD

ek ke baad ek raste mein guzarne ke liye

muntazir baiThe hue hain hadse assi karoD

muKHtalif andaz ke hain muKHtalif lahjon mein hain

ek kitab-e-zindagi ke tarjume assi karoD

dekhiye kab KHatm ho ghuT ghuT ke jine ki saza

ek rassi bhuk ki hai aur gale assi karoD

KHud hi 'kazim' rakh diye hum ne jila ke waste

chand fan-karon ke aage aaine assi karoD