kya doge dawa tumko pata kuchh bhi nahin hai

kyā doge davā tum ko pata kuchh bhī nahīñ hai

bīmār-e-mohabbat kī davā kuchh bhī nahīñ hai

dīvāna-e-ulfat pe bachā kuchh bhī nahīñ hai

is dil meñ tire ġham ke sivā kuchh bhī nahīñ hai

iz.hār ke āsār 'ayāñ ho ga.e ruḳh se

maiñ ne to abhī lab se kahā kuchh bhī nahīñ hai

nādān the us shaḳhs se kī ham ne mohabbat

jis shaḳhs kī nazroñ meñ vafā kuchh bhī nahīñ hai

dīdār kī hasrat meñ guzar jaa.e na jaañ se

bīmār ko ārām zarā kuchh bhī nahīñ hai

ye nazm-e-jahāñ kaun chalātā hai batā.eñ

jo log ye kahte haiñ ḳhudā kuchh bhī nahīñ hai

ai husn ke paikar mire mahbūb ke aage

ye naaz ye shoḳhī ye adā kuchh bhī nahīñ hai

mujrim hai khule-ām ye insāf to dekho

hai us ko sazā jis kī ḳhatā kuchh bhī nahīñ hai

'faisal' rah-e-ulfat meñ gañvāyā hai sabhī kuchh

bas dard hī paa.e haiñ milā kuchh bhī nahīñ hai

kya doge dawa tum ko pata kuchh bhi nahin hai

bimar-e-mohabbat ki dawa kuchh bhi nahin hai

diwana-e-ulfat pe bacha kuchh bhi nahin hai

is dil mein tere gham ke siwa kuchh bhi nahin hai

izhaar ke aasar 'ayan ho gae ruKH se

main ne to abhi lab se kaha kuchh bhi nahin hai

nadan the us shaKHs se ki hum ne mohabbat

jis shaKHs ki nazron mein wafa kuchh bhi nahin hai

didar ki hasrat mein guzar jae na jaan se

bimar ko aaram zara kuchh bhi nahin hai

ye nazm-e-jahan kaun chalata hai bataen

jo log ye kahte hain KHuda kuchh bhi nahin hai

ai husn ke paikar mere mahbub ke aage

ye naz ye shoKHi ye ada kuchh bhi nahin hai

mujrim hai khule-am ye insaf to dekho

hai us ko saza jis ki KHata kuchh bhi nahin hai

'faisal' rah-e-ulfat mein ganwaya hai sabhi kuchh

bas dard hi pae hain mila kuchh bhi nahin hai