kya ghazab hai ki mulaqat ka imkan bhi nahin

kyā ġhazab hai ki mulāqāt kā imkāñ bhī nahīñ

aur ab us ko bhulānā koī āsāñ bhī nahīñ

kise dekhūñ kise āñkhoñ se lagā.ūñ ai dil

rū-e-tābāñ bhī nahīñ zulf-e-pareshāñ bhī nahīñ

aur haiñ aaj Thikāne tire dīvānoñ ke

koh-o-sahrā bhī nahīñ dasht-o-bayābāñ bhī nahīñ

jaane kyā baat hai sab ahl-e-junūñ haiñ ḳhāmosh

aaj vo silsila-e-chāk-e-garebāñ bhī nahīñ

ġham-e-pinhāñ nazar aatā hai mujhe dushman-e-jāñ

haa.e ye dard ki jis kā koī darmāñ bhī nahīñ

kaun jaane mirā anjām sahar tak kyā ho

aaj koī dil-e-bīmār kā pursāñ bhī nahīñ

haa.e ye ghar ki ab is meñ nahīñ bastā koī

haif ye dil ki ab is meñ koī armāñ bhī nahīñ

uf ye tanhā.ī ye vahshat ye sukūt-e-shab-e-tār

aur shabistāñ meñ koī sham-e-farozāñ bhī nahīñ

saath us gul ke gayā dil se gulistāñ kā ḳhayāl

ab mujhe ārzū-e-fasl-e-bahārāñ bhī nahīñ

kya ghazab hai ki mulaqat ka imkan bhi nahin

aur ab us ko bhulana koi aasan bhi nahin

kise dekhun kise aankhon se lagaun ai dil

ru-e-taban bhi nahin zulf-e-pareshan bhi nahin

aur hain aaj Thikane tere diwanon ke

koh-o-sahra bhi nahin dasht-o-bayaban bhi nahin

jaane kya baat hai sab ahl-e-junun hain KHamosh

aaj wo silsila-e-chaak-e-gareban bhi nahin

gham-e-pinhan nazar aata hai mujhe dushman-e-jaan

hae ye dard ki jis ka koi darman bhi nahin

kaun jaane mera anjam sahar tak kya ho

aaj koi dil-e-bimar ka pursan bhi nahin

hae ye ghar ki ab is mein nahin basta koi

haif ye dil ki ab is mein koi arman bhi nahin

uf ye tanhai ye wahshat ye sukut-e-shab-e-tar

aur shabistan mein koi sham-e-farozan bhi nahin

sath us gul ke gaya dil se gulistan ka KHayal

ab mujhe aarzu-e-fasl-e-bahaaran bhi nahin