kya guman tha ki na hoga koi ham-sar apna

kyā gumāñ thā ki na hogā koī ham-sar apnā

din Dhale saaya muqābil huā baḌh kar apnā

ghar se nālāñ the magar dekhī hai duniyā ham ne

hai agar koī amāñ-gāh to bas ghar apnā

dard pe kaisā sharar ban ke uThā pahlū meñ

ham to yuuñ ḳhush the ki dil kar liyā patthar apnā

rāt-bhar koī na so.e to sune shor-e-fuġhāñ

chāñd ko dard sunātā hai samundar apnā

dukh uThā.e to bahut rañg ḳhud apne dekhe

kam qayāmat se na thā jo bhī thā manzar apnā

roz-o-shab apne kisī se nahīñ milte haiñ 'kamāl'

ham to laa.e haiñ alag sab se muqaddar apnā

kya guman tha ki na hoga koi ham-sar apna

din Dhale saya muqabil hua baDh kar apna

ghar se nalan the magar dekhi hai duniya hum ne

hai agar koi aman-gah to bas ghar apna

dard pe kaisa sharar ban ke uTha pahlu mein

hum to yun KHush the ki dil kar liya patthar apna

raat-bhar koi na soe to sune shor-e-fughan

chand ko dard sunata hai samundar apna

dukh uThae to bahut rang KHud apne dekhe

kam qayamat se na tha jo bhi tha manzar apna

roz-o-shab apne kisi se nahin milte hain 'kamal'

hum to lae hain alag sab se muqaddar apna