kya hai sakin koi kah sakta hai kya chal raha hai

kyā hai sākin koī kah saktā hai kyā chal rahā hai

dasht-e-tasvīr meñ naqsh-e-kaf-e-pā chal rahā hai

kā.enātoñ ke bhañvar Duub rahe haiñ mujh meñ

kis ko ma.alūm mire zehn meñ kyā chal rahā hai

apne siine meñ liye chaudah arab saal kā dukh

maiñ akelā to nahīñ saath ḳhudā chal rahā hai

mutma.in kaise kisī aur se ho paa.e vo dil

jis kā ḳhud apnī hī dhaḌkan se gila chal rahā hai

sun rahā huuñ maiñ chaTak ġhuncha-e-mustaqbil kī

baaġh meñ tazkira-e-bād-e-sabā chal rahā hai

saañs chaltī hai tire hijr meñ aise merī

jaise sahrā meñ koī ābla-pā chal rahā hai

ek pāñse meñ palaT saktī hai baazī pyāre

dekhtā jā abhī sāñsoñ kā juā chal rahā hai

kuchh bhī sākin nahīñ is ālam-e-kun meñ 'armān'

hasb-e-taufīq har-ik chhoTā-baḌā chal rahā hai

kya hai sakin koi kah sakta hai kya chal raha hai

dasht-e-taswir mein naqsh-e-kaf-e-pa chal raha hai

kaenaton ke bhanwar Dub rahe hain mujh mein

kis ko malum mere zehn mein kya chal raha hai

apne sine mein liye chaudah arab sal ka dukh

main akela to nahin sath KHuda chal raha hai

mutmain kaise kisi aur se ho pae wo dil

jis ka KHud apni hi dhaDkan se gila chal raha hai

sun raha hun main chaTak ghuncha-e-mustaqbil ki

bagh mein tazkira-e-baad-e-saba chal raha hai

sans chalti hai tere hijr mein aise meri

jaise sahra mein koi aabla-pa chal raha hai

ek panse mein palaT sakti hai bazi pyare

dekhta ja abhi sanson ka jua chal raha hai

kuchh bhi sakin nahin is aalam-e-kun mein 'arman'

hasb-e-taufiq har-ik chhoTa-baDa chal raha hai