kya ho taskin jo ho teri sukunat dil mein

kyā ho taskīn jo ho terī sukūnat dil meñ

rahe āġhosh meñ yā pyaar kī sūrat dil meñ

maut chāhūñ to karūñ soz-e-mohabbat kā ilaaj

kyā rahegā na rahegī jo harārat dil meñ

dil-nashīñ hai jo mujhe tālib-e-izzat honā

chhup ke baiThā hai koī sāhab-e-izzat dil meñ

dil ko sab log ye kahte haiñ ḳhudā kā ghar hai

maiñ samajhtā huuñ ki hai terī amānat dil meñ

sun rahā huuñ vo ayādat ke liye aate haiñ

aaj hai pursish-e-āmāl kī haibat dil meñ

tauba tauba maiñ samajhtā thā ki dil hai betāb

ḳhud vo betāb hai jis kī hai sukūnat dil meñ

dil meñ rahne kā tujhe haq to hai lekin ai shoḳh

kaash hotī tire chehre kī matānat dil meñ

jānte haiñ mirī be-rāh-ravī ke asbāb

mānte haiñ mujhe yārān-e-tarīqat dil meñ

Than ga.ī thī tire aḳhlāq kī bejā tārīf

ab na aatā to ye aa.ī thī sharārat dil meñ

hai abhī tak to faqat sikva-e-dushman ai dost

kahīñ paidā na ho kuchh aur shikāyat dil meñ

chāhtā huuñ jise ban jaa.e agar vo saaqī

baḌhtī jaa.e havas-e-kausar-o-jannat dil meñ

zauq-e-dīdār bhī kyā chiiz hai allāh allāh

merī āñkhoñ meñ basārat hai basīrat dil meñ

kaash min-jumla-e-āzār-e-mohabbat nikle

kār-farmā nazar aatī hai jo quvvat dil meñ

haiñ abhī tak tumheñ duniyā ke maze yaad safī'

āshiqī karte ho rakh kar ye malāmat dil meñ

kya ho taskin jo ho teri sukunat dil mein

rahe aaghosh mein ya pyar ki surat dil mein

maut chahun to karun soz-e-mohabbat ka ilaj

kya rahega na rahegi jo hararat dil mein

dil-nashin hai jo mujhe talib-e-izzat hona

chhup ke baiTha hai koi sahab-e-izzat dil mein

dil ko sab log ye kahte hain KHuda ka ghar hai

main samajhta hun ki hai teri amanat dil mein

sun raha hun wo ayaadat ke liye aate hain

aaj hai pursish-e-amal ki haibat dil mein

tauba tauba main samajhta tha ki dil hai betab

KHud wo betab hai jis ki hai sukunat dil mein

dil mein rahne ka tujhe haq to hai lekin ai shoKH

kash hoti tere chehre ki matanat dil mein

jaante hain meri be-rah-rawi ke asbab

mante hain mujhe yaran-e-tariqat dil mein

Than gai thi tere aKHlaq ki beja tarif

ab na aata to ye aai thi shararat dil mein

hai abhi tak to faqat sikwa-e-dushman ai dost

kahin paida na ho kuchh aur shikayat dil mein

chahta hun jise ban jae agar wo saqi

baDhti jae hawas-e-kausar-o-jannat dil mein

zauq-e-didar bhi kya chiz hai allah allah

meri aankhon mein basarat hai basirat dil mein

kash min-jumla-e-azar-e-mohabbat nikle

kar-farma nazar aati hai jo quwwat dil mein

hain abhi tak tumhein duniya ke maze yaad safi'

aashiqi karte ho rakh kar ye malamat dil mein