kya hua humne agar ishq mein ujlat nahin ki

kyā huā ham ne agar ishq meñ ujlat nahīñ kī

TuuT kar us ne bhī ham se to mohabbat nahīñ kī

faisla yuuñ to sadā sunte rahe apne ḳhilāf

is qabīle se magar ham ne baġhāvat nahīñ kī

rabt us shaḳhs se chāhā thā ki qaa.em rahtā

mere sukh-dukh meñ kabhī us ne hī shirkat nahīñ kī

apne bachchoñ se mohabbat ke talabgār rahe

bāvajūde-ki buzurgoñ kī bhī izzat nahīñ kī

us ne tamġha jo atā mujh ko kiyā ḳhuub kiyā

maiñ ne jī-jān se kab us kī itā.at nahīñ kī

dūsre shahr kī miTTī kise apnātī hai

apnī bastī se kahīñ ham ne bhī hijrat nahīñ kī

nekiyāñ jitnī bhī kar sakte the bas karte rahe

aur badle meñ kabhī ḳhvāhish-e-jannat nahīñ kī

aisā lagtā hai ki ham bhī the sadā ke būḌhe

ya.anī bachpan meñ bhī kuchh jam ke sharārat nahīñ kī

kya hua hum ne agar ishq mein ujlat nahin ki

TuT kar us ne bhi hum se to mohabbat nahin ki

faisla yun to sada sunte rahe apne KHilaf

is qabile se magar hum ne baghawat nahin ki

rabt us shaKHs se chaha tha ki qaem rahta

mere sukh-dukh mein kabhi us ne hi shirkat nahin ki

apne bachchon se mohabbat ke talabgar rahe

bawajude-ki buzurgon ki bhi izzat nahin ki

us ne tamgha jo ata mujh ko kiya KHub kiya

main ne ji-jaan se kab us ki itaat nahin ki

dusre shahr ki miTTi kise apnati hai

apni basti se kahin hum ne bhi hijrat nahin ki

nekiyan jitni bhi kar sakte the bas karte rahe

aur badle mein kabhi KHwahish-e-jannat nahin ki

aisa lagta hai ki hum bhi the sada ke buDhe

yani bachpan mein bhi kuchh jam ke shararat nahin ki