kya is ka gila kije use pyar hi kab tha

kyā is kā gilā kiije use pyaar hī kab thā

vo ahd-e-farāmosh vafādār hī kab thā

us ne to sadā puuje haiñ uḌte hue jugnū

vo chāñd-sitāroñ kā parastār hī kab thā

ham Duub ga.e jāgtī rātoñ ke bhañvar meñ

haath us kā hamāre liye patvār hī kab thā

aamoñ kī hasīñ rut ke sivā bhī to vo kuuke

lekin kisī koyal kā ye kirdār hī kab thā

āvāz jo maiñ duuñ to kisī aur ko chhū le

is āñkh-micholī se vo bezār hī kab thā

tum us ko bure naam se yaaro na pukāro

ye naam use bā.is-e-āzār hī kab thā

mash.hūr-e-zamāna haiñ 'qatīl' us kī uḌāneñ

vo dām-e-mohabbat meñ giraftār hī kab thā

kya is ka gila kije use pyar hi kab tha

wo ahd-e-faramosh wafadar hi kab tha

us ne to sada puje hain uDte hue jugnu

wo chand-sitaron ka parastar hi kab tha

hum Dub gae jagti raaton ke bhanwar mein

hath us ka hamare liye patwar hi kab tha

aamon ki hasin rut ke siwa bhi to wo kuke

lekin kisi koyal ka ye kirdar hi kab tha

aawaz jo main dun to kisi aur ko chhu le

is aankh-micholi se wo bezar hi kab tha

tum us ko bure nam se yaro na pukaro

ye nam use bais-e-azar hi kab tha

mashhur-e-zamana hain 'qatil' us ki uDanen

wo dam-e-mohabbat mein giraftar hi kab tha