kya ishq ka len nam hawas aam nahin hai

kyā ishq kā leñ naam havas aam nahīñ hai

andhoñ ko añdhere meñ koī kaam nahīñ hai

thā jaam to is aas pe baiThe the ki mai aa.e

mai aa.ī to rindoñ ke liye jaam nahīñ hai

jiite ho to jiine kā evaz ziist se māñgo

maut apnā muqaddar hai ye in.aam nahīñ hai

kaT jā.egī ye raat guzāro kisī karvaT

ab sub.h se pahle to koī shaam nahīñ hai

jiite the ki sar-e-dosh pe thā bār-e-garāñ thā

marte haiñ ki sar par koī ilzām nahīñ hai

yaañ raushani-e-sub.h to vaañ nik.hat-e-gul hai

yuuñ husn-e-gurezāñ kā koī naam nahīñ hai

ḳhud vaqt ko miltā hai sukūñ terī galī meñ

sunte haiñ vahāñ gardish-e-ayyām nahīñ hai

saaya huuñ magar mehr-e-daraḳhshāñ se hai nisbat

zulmat huuñ par andhoñ se mujhe kaam nahīñ hai

'bāqar' se nahīñ izzat-e-sādāt pe kuchh harf

āshiq to banā phirtā hai badnām nahīñ hai

kya ishq ka len nam hawas aam nahin hai

andhon ko andhere mein koi kaam nahin hai

tha jam to is aas pe baiThe the ki mai aae

mai aai to rindon ke liye jam nahin hai

jite ho to jine ka ewaz zist se mango

maut apna muqaddar hai ye inam nahin hai

kaT jaegi ye raat guzaro kisi karwaT

ab subh se pahle to koi sham nahin hai

jite the ki sar-e-dosh pe tha bar-e-garan tha

marte hain ki sar par koi ilzam nahin hai

yan raushani-e-subh to wan nikhat-e-gul hai

yun husn-e-gurezan ka koi nam nahin hai

KHud waqt ko milta hai sukun teri gali mein

sunte hain wahan gardish-e-ayyam nahin hai

saya hun magar mehr-e-daraKHshan se hai nisbat

zulmat hun par andhon se mujhe kaam nahin hai

'baqar' se nahin izzat-e-sadat pe kuchh harf

aashiq to bana phirta hai badnam nahin hai