kya jaaniye kya ishq ka mear kahe hai

kyā jāniye kyā ishq kā me.aar kahe hai

sajde ko bhī tauhīn-e-dar-e-yār kahe hai

kyā baat ye ai aql ke bīmār kahe hai

ġham aise hasīñ phuul ko tū ḳhaar kahe

jis baat ko kahte hue Dartā hai zamāna

vo mere sivā kaun sar-e-dār kahe hai

ai josh-e-junūñ tū hī qadam apne baḌhā de

ye aql to har raah ko dushvār kahe hai

vo ziist jise dil kī jarāhat kā hai ehsās

har saañs ko chaltī huī talvār kahe hai

bekār sahī aañkh se Tapkā huā aañsū

anmol ise merā ḳharīdār kahe hai

kaun aisā hai vaa.iz jo gunāhoñ se bachā ho

kyoñ bāda-parastoñ ko gunahgār kahe hai

is bazm meñ jo bhī nazar aatā hai vo be-ḳhud

ye hosh kahāñ kyā nigah-e-yār kahe hai

fursat ho to ġham-ḳhāne meñ aakar kabhī sun lo

'shā.ir' kā fasāna dar-o-dīvār kahe hai

kya jaaniye kya ishq ka mear kahe hai

sajde ko bhi tauhin-e-dar-e-yar kahe hai

kya baat ye ai aql ke bimar kahe hai

gham aise hasin phul ko tu KHar kahe

jis baat ko kahte hue Darta hai zamana

wo mere siwa kaun sar-e-dar kahe hai

ai josh-e-junun tu hi qadam apne baDha de

ye aql to har rah ko dushwar kahe hai

wo zist jise dil ki jarahat ka hai ehsas

har sans ko chalti hui talwar kahe hai

bekar sahi aankh se Tapka hua aansu

anmol ise mera KHaridar kahe hai

kaun aisa hai waiz jo gunahon se bacha ho

kyon baada-paraston ko gunahgar kahe hai

is bazm mein jo bhi nazar aata hai wo be-KHud

ye hosh kahan kya nigah-e-yar kahe hai

fursat ho to gham-KHane mein aakar kabhi sun lo

'shair' ka fasana dar-o-diwar kahe hai