kya kahen lutf-o-inayat kise kahte hain

kyā kaheñ lutf-o-'ināyāt kise kahte haiñ

pūchhiye ham se ki sadmāt kise kahte haiñ

apne baare meñ to ham ne kabhī sochā hī nahīñ

kyā batā.eñ ki ġham-e-zāt kise kahte haiñ

kar diyā ġharq mujhe tum ne sahārā de kar

ye 'ināyat hai to phir ghaat kise kahte haiñ

hausla hārnā fitrat meñ nahīñ hai shāmil

ham ko mā'lūm nahīñ maat kise kahte haiñ

ham taġhāful kī shikāyat nahīñ karte lekin

ye batāo ki 'ināyāt kise kahte haiñ

aap ne dil ko khilaune kī tarah toḌ diyā

aap kyā jāneñ ki jazbāt kise kahte haiñ

kaun dar-parda tire 'ishq meñ Duubā hai 'shakīl'

log jā jā ke tirī baat kise kahte haiñ

kya kahen lutf-o-'inayat kise kahte hain

puchhiye hum se ki sadmat kise kahte hain

apne bare mein to hum ne kabhi socha hi nahin

kya bataen ki gham-e-zat kise kahte hain

kar diya gharq mujhe tum ne sahaara de kar

ye 'inayat hai to phir ghat kise kahte hain

hausla haarna fitrat mein nahin hai shamil

hum ko ma'lum nahin mat kise kahte hain

hum taghaful ki shikayat nahin karte lekin

ye batao ki 'inayat kise kahte hain

aap ne dil ko khilaune ki tarah toD diya

aap kya jaanen ki jazbaat kise kahte hain

kaun dar-parda tere 'ishq mein Duba hai 'shakil'

log ja ja ke teri baat kise kahte hain