kya kahen mahfil se teri kya uTha kar le gae

kyā kaheñ mahfil se terī kyā uThā kar le ga.e

ham matā-e-dard ko tanhā uThā kar le ga.e

dhuup kā sahrā nazar aatā hai ab chāroñ taraf

aap to har peḌ kā saayā uThā kar le ga.e

is bharī duniyā meñ ab to koī bhī apnā nahīñ

jaise tum har dard kā rishta uThā kar le ga.e

qatre qatre ko taraste haiñ vo ab ahl-e-havas

jo kabhī dhartī se har dariyā uThā kar le ga.e

ab vahī zarre hamāre haal par haiñ ḳhanda-zan

āsmāñ tak jin ko ham ūñchā uThā kar le ga.e

kyā ġharaz ham ko vahāñ ab koī bhī ābād ho

ham to us bastī se ghar apnā uThā kar le ga.e

vo to majnūñ thā rahā jo umar bhar sahrā-navard

ham jahāñ pahuñche vahīñ sahrā uThā kar le ga.e

kar na paa.e rāhbar bhī rahnumā.ī jab 'hayāt'

ham bhī hairānī meñ naqsh-e-pā uThā kar le ga.e

kya kahen mahfil se teri kya uTha kar le gae

hum mata-e-dard ko tanha uTha kar le gae

dhup ka sahra nazar aata hai ab chaaron taraf

aap to har peD ka saya uTha kar le gae

is bhari duniya mein ab to koi bhi apna nahin

jaise tum har dard ka rishta uTha kar le gae

qatre qatre ko taraste hain wo ab ahl-e-hawas

jo kabhi dharti se har dariya uTha kar le gae

ab wahi zarre hamare haal par hain KHanda-zan

aasman tak jin ko hum uncha uTha kar le gae

kya gharaz hum ko wahan ab koi bhi aabaad ho

hum to us basti se ghar apna uTha kar le gae

wo to majnun tha raha jo umar bhar sahra-naward

hum jahan pahunche wahin sahra uTha kar le gae

kar na pae rahbar bhi rahnumai jab 'hayat'

hum bhi hairani mein naqsh-e-pa uTha kar le gae