kya kahun kya husul-e-hasti hai

kyā kahūñ kyā husūl-e-hastī hai

ruuh qaid-e-balā meñ phañstī hai

zard-rūī se za.afarāñ huuñ maiñ

ḳhalq hastī pe mere hañstī hai

nahīñ jis dil meñ dāġh-e-ishq-e-butāñ

ba-ḳhudā be-charāġh bastī hai

jhukte haiñ jo najīb hote haiñ

sach hai teġh-e-asīl kastī hai

yaad us kākul-e-pareshāñ kī

rāt-bhar ban ke saañp Dastī hai

mast-o-majzūb meñ nahīñ kuchh farq

mai-parastī ḳhudā-parastī hai

ek botal to le ke aa saaqī

jaan mai-ḳhvāroñ kī tarastī hai

ThanDī ThanDī havā hai gulshan meñ

dhīmī dhīmī ghaTā barastī hai

dūd-e-dil se hai rū-siyāh falak

aah gardūñ kā muñh jhulastī hai

nīstī kā mazā nahīñ miltā

'bāqī' jab tak ki apnī hastī hai

kya kahun kya husul-e-hasti hai

ruh qaid-e-bala mein phansti hai

zard-rui se zafaran hun main

KHalq hasti pe mere hansti hai

nahin jis dil mein dagh-e-ishq-e-butan

ba-KHuda be-charagh basti hai

jhukte hain jo najib hote hain

sach hai tegh-e-asil kasti hai

yaad us kakul-e-pareshan ki

raat-bhar ban ke sanp Dasti hai

mast-o-majzub mein nahin kuchh farq

mai-parasti KHuda-parasti hai

ek botal to le ke aa saqi

jaan mai-KHwaron ki tarasti hai

ThanDi ThanDi hawa hai gulshan mein

dhimi dhimi ghaTa barasti hai

dud-e-dil se hai ru-siyah falak

aah gardun ka munh jhulasti hai

nisti ka maza nahin milta

'baqi' jab tak ki apni hasti hai