kya kare koi chaaragar yaro

kyā kare koī chārāgar yaaro

har asar jab ho be-asar yaaro

ham samajhte haiñ ziist meñ ham ne

zaḳhm khaa.e haiñ kis qadar yaaro

is se pahle ki bijliyāñ phūñkeñ

phūñk do bijliyoñ ke ghar yaaro

sarfarāzī hameñ na mil paatī

ham na chaḌhte jo daar par yaaro

bach sakeñge kahāñ paḌosī bhī

jal to jā.egā merā ghar yaaro

faisla ho chukā jo honā thā

ab ye kyā hai agar-magar yaaro

tum ko manzil kabhī na mil paatī

ham na bante jo rāhbar yaaro

tum hī munsif ho faisla kar do

pesh haiñ zer aur zabar yaaro

be-ruḳhī ham se āḳhirash kab tak

ab to ham par bhī ik nazar yaaro

ham sazā-vār-e-har-sazā yuuñ haiñ

ban sake ham na ḳhud-nigar yaaro

aa.ina kar ga.e haiñ 'hairat' ko

hazrat-e-'abr' aur 'qamar' yaaro

kya kare koi chaaragar yaro

har asar jab ho be-asar yaro

hum samajhte hain zist mein hum ne

zaKHm khae hain kis qadar yaro

is se pahle ki bijliyan phunken

phunk do bijliyon ke ghar yaro

sarfaraazi hamein na mil pati

hum na chaDhte jo dar par yaro

bach sakenge kahan paDosi bhi

jal to jaega mera ghar yaro

faisla ho chuka jo hona tha

ab ye kya hai agar-magar yaro

tum ko manzil kabhi na mil pati

hum na bante jo rahbar yaro

tum hi munsif ho faisla kar do

pesh hain zer aur zabar yaro

be-ruKHi hum se aaKHirash kab tak

ab to hum par bhi ek nazar yaro

hum saza-war-e-har-saza yun hain

ban sake hum na KHud-nigar yaro

aaina kar gae hain 'hairat' ko

hazrat-e-'abr' aur 'qamar' yaro