kya karte kahin aur Thikana hi nahin tha

kyā karte kahīñ aur Thikāna hī nahīñ thā

varna hameñ is kūche meñ aanā hī nahīñ thā

hangāma-e-vahshat thā jahāñ jashn-e-junūñ meñ

dekhā to vahāñ koī divāna hī nahīñ thā

vo dil kī lagī hai ki bujhā.e nahīñ bujhtī

kal raat gale us ko lagānā hī nahīñ thā

miltā hai to ab aañkh milā bhī nahīñ paatā

vo ḳhvāb use yaad dilānā hī nahīñ thā

jab dekho usī yaad ke narġhe meñ paḌe ho

ye haal agar hai to bhulānā hī nahīñ thā

tārīkī-e-sahrā meñ Darātī hai ik āvāz

yuuñ dil ko sar-e-shām bujhānā hī nahīñ thā

vo shaḳhs jise soch ke āñkhoñ meñ ga.ī raat

'mahfūz' use dhyān meñ laanā hī nahīñ thā

kya karte kahin aur Thikana hi nahin tha

warna hamein is kuche mein aana hi nahin tha

hangama-e-wahshat tha jahan jashn-e-junun mein

dekha to wahan koi diwana hi nahin tha

wo dil ki lagi hai ki bujhae nahin bujhti

kal raat gale us ko lagana hi nahin tha

milta hai to ab aankh mila bhi nahin pata

wo KHwab use yaad dilana hi nahin tha

jab dekho usi yaad ke narghe mein paDe ho

ye haal agar hai to bhulana hi nahin tha

tariki-e-sahra mein Daraati hai ek aawaz

yun dil ko sar-e-sham bujhana hi nahin tha

wo shaKHs jise soch ke aankhon mein gai raat

'mahfuz' use dhyan mein lana hi nahin tha