kya karun ranj gawara na KHushi ras mujhe

kyā karūñ rañj gavārā na ḳhushī raas mujhe

jiine degī na mirī shiddat-e-ehsās mujhe

is tarah bhī tirī duurī meñ kaTe haiñ kuchh din

hañs paḌā huuñ to huā jurm kā ehsās mujhe

ham ne ik dūsre ko pursa-e-furqat na diyā

merī ḳhātir thī tujhe aur tirā paas mujhe

ek Thahrā huā dariyā hai mirī āñkhoñ meñ

kin sarāboñ meñ Dubotī hai tirī pyaas mujhe

jaise pahlū-e-tarab meñ koī nashtar rakh de

aaj tak yaad hai terī nigah-e-yās mujhe

reza reza huā jaatā hai mirā sañg-e-vajūd

yuuñ sadā de na pas-e-parda-e-anfās mujhe

shāḳh se barg-e-chakīda kā taqāzā jaise

kuchh is tarah abhī tak hai tirī aas mujhe

ruuh ke dasht meñ ik ho kā samāñ hai ai 'shāz'

de gayā kaun bhare shahr meñ ban-bās mujhe

kya karun ranj gawara na KHushi ras mujhe

jine degi na meri shiddat-e-ehsas mujhe

is tarah bhi teri duri mein kaTe hain kuchh din

hans paDa hun to hua jurm ka ehsas mujhe

hum ne ek dusre ko pursa-e-furqat na diya

meri KHatir thi tujhe aur tera pas mujhe

ek Thahra hua dariya hai meri aankhon mein

kin sarabon mein Duboti hai teri pyas mujhe

jaise pahlu-e-tarab mein koi nashtar rakh de

aaj tak yaad hai teri nigah-e-yas mujhe

reza reza hua jata hai mera sang-e-wajud

yun sada de na pas-e-parda-e-anfas mujhe

shaKH se barg-e-chakida ka taqaza jaise

kuchh is tarah abhi tak hai teri aas mujhe

ruh ke dasht mein ek ho ka saman hai ai 'shaz'

de gaya kaun bhare shahr mein ban-bas mujhe