kya kashish allah re duniya-e-ab-o-gil mein hai

kyā kashish allāh re duniyā-e-āb-o-gil meñ hai

tā-abad jiine kī ḳhvāhish har bashar ke dil meñ hai

biit jaa.e kyā ḳhudā jaane jahān-e-shauq par

vo to kahiye lailā-e-husn-e-azal mahmil meñ hai

kuchh hamīñ pahchānte haiñ rū-e-tābāñ ko tire

zikr tere husn kā kahne ko har mahfil meñ hai

kaash ye khul jaa.e tujh par ai asīr-e-āb-o-gil

ik surūr-e-be-karāñ tasḳhīr-e-āb-o-gil meñ hai

koī mahram hī nahīñ jab rāz-hā-e-ishq kā

ham kisī ko kyā batā.eñ kyā hamāre dil meñ hai

ishq ne tai kar liye haft-āsmāñ muddat huī

aql-e-nādāñ gum abhī tak jāda-e-manzil meñ hai

rahzan-e-hosh-o-ḳhirad hai ye jahān-e-rang-o-bū

ḳhud se begāna hai 'sābir' jo bhī is mahfil meñ hai

kya kashish allah re duniya-e-ab-o-gil mein hai

ta-abad jine ki KHwahish har bashar ke dil mein hai

bit jae kya KHuda jaane jahan-e-shauq par

wo to kahiye laila-e-husn-e-azal mahmil mein hai

kuchh hamin pahchante hain ru-e-taban ko tere

zikr tere husn ka kahne ko har mahfil mein hai

kash ye khul jae tujh par ai asir-e-ab-o-gil

ek surur-e-be-karan tasKHir-e-ab-o-gil mein hai

koi mahram hi nahin jab raaz-ha-e-ishq ka

hum kisi ko kya bataen kya hamare dil mein hai

ishq ne tai kar liye haft-asman muddat hui

aql-e-nadan gum abhi tak jada-e-manzil mein hai

rahzan-e-hosh-o-KHirad hai ye jahan-e-rang-o-bu

KHud se begana hai 'sabir' jo bhi is mahfil mein hai