kya KHak kahun matlab-e-dildar ke aage

kyā ḳhaak kahūñ matlab-e-dildār ke aage

so aur sunā.egā vo aġhyār ke aage

bolā thā jo āġhāz-e-mohabbat meñ baḌā bol

aayā vahī āḳhir dil-e-bīmār ke aage

rokā hī kiyā zabt-e-mohabbat sar-e-mahfil

sar jhuk hī gayā us but-e-ayyār ke aage

paidā nahīñ duniyā meñ davā-e-maraz-e-ishq

kyā log na hote the is āzār ke aage

fariyādī-e-be-dād-e-jafā jaan ke mujh ko

mahshar meñ vo chalte hue lalkār ke aage

martā hai kasī aur pe ab ġhair sunā hai

bolūñgā kabhī jhuuT na sarkār ke aage

aa jaa.e 'nasīm' us ko tarahhum to ajab kyā

chal le to chaleñ tujh ko tire yaar ke aage

kya KHak kahun matlab-e-dildar ke aage

so aur sunaega wo aghyar ke aage

bola tha jo aaghaz-e-mohabbat mein baDa bol

aaya wahi aaKHir dil-e-bimar ke aage

roka hi kiya zabt-e-mohabbat sar-e-mahfil

sar jhuk hi gaya us but-e-ayyar ke aage

paida nahin duniya mein dawa-e-maraz-e-ishq

kya log na hote the is aazar ke aage

fariyaadi-e-be-dad-e-jafa jaan ke mujh ko

mahshar mein wo chalte hue lalkar ke aage

marta hai kasi aur pe ab ghair suna hai

bolunga kabhi jhuT na sarkar ke aage

aa jae 'nasim' us ko tarahhum to ajab kya

chal le to chalen tujh ko tere yar ke aage