kya KHabar thi aatishin aab-o-hawa ho jaunga

kyā ḳhabar thī ātishīñ āb-o-havā ho jā.ūñgā

ḳhaak o ḳhuuñ kā mustaqil maiñ silsila ho jā.ūñgā

ibtidā huuñ āp-apnī intihā ho jā.ūñgā

bārishoñ kā qurb pā kar phir harā ho jā.ūñgā

jhāḌiyoñ kī uñgliyāñ lapkeñgī gardan kī taraf

pahlī shab ke āḳhirī pal kī duā ho jā.ūñgā

āsmāñ kī samt uTTheñge bagūle aur maiñ

rafta rafta ik maqām-e-gum-shuda ho jā.ūñgā

chilchilātī dhuup meñ apnā sarāpā dekh kar

raat kī tanhā.iyoñ kā vasvasa ho jā.ūñgā

kuchh na kuchh khotā chalā jā.ūñgā ik ik moḌ par

aur phir maiñ ek din terā kahā ho jā.ūñgā

khurdure aur khokhle bargad kā baazū thaam kar

sub.h-e-sīmīñ kā ma.āl-e-tai-shuda ho jā.ūñgā

jab koī jhukne lagegā shaam kī dahlīz par

gumbad-e-mauhūm kā maiñ mubtanā ho jā.ūñgā

phaḌ.phaḌāte dekh kar tāroñ meñ kaftar ko 'nizām'

uñgliyoñ kī uljhanoñ meñ mubtalā ho jā.ūñgā

kya KHabar thi aatishin aab-o-hawa ho jaunga

KHak o KHun ka mustaqil main silsila ho jaunga

ibtida hun aap-apni intiha ho jaunga

barishon ka qurb pa kar phir hara ho jaunga

jhaDiyon ki ungliyan lapkengi gardan ki taraf

pahli shab ke aaKHiri pal ki dua ho jaunga

aasman ki samt uTThenge bagule aur main

rafta rafta ek maqam-e-gum-shuda ho jaunga

chilchilati dhup mein apna sarapa dekh kar

raat ki tanhaiyon ka waswasa ho jaunga

kuchh na kuchh khota chala jaunga ek ek moD par

aur phir main ek din tera kaha ho jaunga

khurdure aur khokhle bargad ka bazu tham kar

subh-e-simin ka maal-e-tai-shuda ho jaunga

jab koi jhukne lagega sham ki dahliz par

gumbad-e-mauhum ka main mubtana ho jaunga

phaDphaDate dekh kar taron mein kaftar ko 'nizam'

ungliyon ki uljhanon mein mubtala ho jaunga