kya KHabar thi wo mata-e-be-baha le jaega

kyā ḳhabar thī vo matā-e-be-bahā le jā.egā

chhīn kar āñkhoñ se ḳhvāboñ kī ridā le jā.egā

maiñ kaf-e-afsos hī maltā rahūñgā umr bhar

vo mirī ġhairat kī dastār-o-qabā le jā.egā

kyā ḳhabar thī is tarah badlegā fitrat kā nizām

vaqt ke gulshan se ġhunchoñ kī sadā le jā.egā

paar karnā hai use dariyā magar ye dekhnā

kah rahā hai saath ik kachchā ghaḌā le jā.egā

sūrat-e-qazzāq koī aa.e yā mānind-e-dost

'shān' koī aa.e mere ghar se kyā le jā.egā

kya KHabar thi wo mata-e-be-baha le jaega

chhin kar aankhon se KHwabon ki rida le jaega

main kaf-e-afsos hi malta rahunga umr bhar

wo meri ghairat ki dastar-o-qaba le jaega

kya KHabar thi is tarah badlega fitrat ka nizam

waqt ke gulshan se ghunchon ki sada le jaega

par karna hai use dariya magar ye dekhna

kah raha hai sath ek kachcha ghaDa le jaega

surat-e-qazzaq koi aae ya manind-e-dost

'shan' koi aae mere ghar se kya le jaega