kya KHabar thi yun mujhe ye aasman likh jaega

kyā ḳhabar thī yuuñ mujhe ye āsmāñ likh jā.egā

vaqt ke aurāq par harf-e-ziyāñ likh jā.egā

tīrgī kī vus.ateñ apnī jagah mahfūz haiñ

vo sitāroñ ke safar ko kahkashāñ likh jā.egā

kāġhazī phūloñ ko le kar yuuñ qatāroñ meñ na rakh

sar-phirā koī mo.arriḳh gulsitāñ likh jā.egā

sail-e-ġham aa.egā chupke se miTāne ke liye

reg-e-sāhil par vo jab nām-o-nishāñ likh jā.egā

apne andar ke ḳhalā meñ gum huā jaatā hai vo

ab makāñ ko bhī kisī din lā-makāñ likh jā.egā

duur tak bikhrī paḌī haiñ sā.atoñ kī kirchiyāñ

ab vo shāyad vaqt ko nā-mehrbāñ likh jā.egā

kyoñ miTātī phir rahī hai gardish-e-ayyām tū

likhne vaalā mujh ko harf-e-jāvedāñ likh jā.egā

kah rahā huuñ maiñ bhī apnī zindagī ke vāqi.āt

likhte likhte vo bhī apnī dāstāñ likh jā.egā

kya KHabar thi yun mujhe ye aasman likh jaega

waqt ke auraq par harf-e-ziyan likh jaega

tirgi ki wusaten apni jagah mahfuz hain

wo sitaron ke safar ko kahkashan likh jaega

kaghazi phulon ko le kar yun qataron mein na rakh

sar-phira koi moarriKH gulsitan likh jaega

sail-e-gham aaega chupke se miTane ke liye

reg-e-sahil par wo jab nam-o-nishan likh jaega

apne andar ke KHala mein gum hua jata hai wo

ab makan ko bhi kisi din la-makan likh jaega

dur tak bikhri paDi hain saaton ki kirchiyan

ab wo shayad waqt ko na-mehrban likh jaega

kyon miTati phir rahi hai gardish-e-ayyam tu

likhne wala mujh ko harf-e-jawedan likh jaega

kah raha hun main bhi apni zindagi ke waqiat

likhte likhte wo bhi apni dastan likh jaega