kya KHata thi meri wo KHafa ho gae

kyā ḳhatā thī mirī vo ḳhafā ho ga.e

maiñ ne samjhā thā kyā aur kyā ho ga.e

jo mohabbat pe qurbān hote rahe

saf.ha-e-dahr par lā-fanā ho ga.e

jis kī fitrat meñ hī thī sirisht-e-vafā

haif hai vo bhī ab bevafā ho ga.e

nā-ḳhudā.ī bhī aatī nahīñ thī jinheñ

kyā zamāna hai vo bhī ḳhudā ho ga.e

kal bhī fitnoñ se ḳhālī na thā ye jahāñ

aaj bhī kitne fitne bapā ho ga.e

yuuñ ġham-e-zindagī ne nikhārā hameñ

ham ḳhazaf se dur-e-be-bahā ho ga.e

paikar-e-nāz kī nāzukī dekhiye

ham bhī 'anjum' ġhazal-āshnā ho ga.e

kya KHata thi meri wo KHafa ho gae

main ne samjha tha kya aur kya ho gae

jo mohabbat pe qurban hote rahe

safha-e-dahr par la-fana ho gae

jis ki fitrat mein hi thi sirisht-e-wafa

haif hai wo bhi ab bewafa ho gae

na-KHudai bhi aati nahin thi jinhen

kya zamana hai wo bhi KHuda ho gae

kal bhi fitnon se KHali na tha ye jahan

aaj bhi kitne fitne bapa ho gae

yun gham-e-zindagi ne nikhaara hamein

hum KHazaf se dur-e-be-baha ho gae

paikar-e-naz ki nazuki dekhiye

hum bhi 'anjum' ghazal-ashna ho gae