kya kisi mai-kash ne mangi hai dua barsat ki

kyā kisī mai-kash ne māñgī hai duā barsāt kī

mai-kada-bardosh aatī hai ghaTā barsāt kī

kyoñ havā bāñdhe na ab har pārsā barsāt kī

be-piye mad.hosh kartī hai fazā barsāt kī

ek muddat se hameñ bhūlā huā thā mai-kada

kuchh taqāzā kar rahī hai phir havā barsāt kī

yuuñ uḌāyā jā rahā thā mere rone kā mazāq

aaj us ne baat chheḌī bārhā barsāt kī

shaġhl-e-mai-noshī hai jaa.ez is liye barsāt meñ

kuchh to piinā chāhiye khā kar havā barsāt kī

dahr meñ ye do hī chīzeñ haiñ dalīl-e-barshgāl

yā hamārī chashm-e-giryāñ yā ghaTā barsāt kī

miltī-jultī hai hamārī chashm-e-giryāñ se bahut

ik zarā pāband-e-mausam hai ghaTā barsāt kī

sāvan aate hī jo ham ro.e kisī kī yaad meñ

ho ga.ī 'sāhir' yahīñ se ibtidā barsāt kī

kya kisi mai-kash ne mangi hai dua barsat ki

mai-kada-bardosh aati hai ghaTa barsat ki

kyon hawa bandhe na ab har parsa barsat ki

be-piye madhosh karti hai faza barsat ki

ek muddat se hamein bhula hua tha mai-kada

kuchh taqaza kar rahi hai phir hawa barsat ki

yun uDaya ja raha tha mere rone ka mazaq

aaj us ne baat chheDi barha barsat ki

shaghl-e-mai-noshi hai jaez is liye barsat mein

kuchh to pina chahiye kha kar hawa barsat ki

dahr mein ye do hi chizen hain dalil-e-barshgal

ya hamari chashm-e-giryan ya ghaTa barsat ki

milti-julti hai hamari chashm-e-giryan se bahut

ek zara paband-e-mausam hai ghaTa barsat ki

sawan aate hi jo hum roe kisi ki yaad mein

ho gai 'sahir' yahin se ibtida barsat ki