kya kya guman na the mujhe apni uDan par

kyā kyā gumāñ na the mujhe apnī uḌaan par

baazū jo shal hue to girā huuñ chaTān par

ḳhuddāriyoñ se kaun ye pūchhe ki aaj tak

kitne azaab ham ne liye apnī jaan par

ab ke na jaane rut ko nazar kis kī khā ga.ī

ik baar bhī paḌī na dhanak āsmān par

kashtī meñ so ga.e jo unheñ ye ḳhabar kahāñ

kitnā hai aaj zor-e-havā bādbān par

ḳhush-fahmiyoñ ke daur se pahle jo thī kabhī

vo bartarī kahāñ hai yaqīñ ko gumān par

ik be-karāñ ḳhalā hai nigāhoñ meñ har taraf

ya.anī zamīn par haiñ na ham āsmān par

'ḳhāvar' bhī zindagī se nabard-āzmā huā

kyā shaḳhs thā jo khel gayā apnī jaan par

kya kya guman na the mujhe apni uDan par

bazu jo shal hue to gira hun chaTan par

KHuddariyon se kaun ye puchhe ki aaj tak

kitne azab hum ne liye apni jaan par

ab ke na jaane rut ko nazar kis ki kha gai

ek bar bhi paDi na dhanak aasman par

kashti mein so gae jo unhen ye KHabar kahan

kitna hai aaj zor-e-hawa baadban par

KHush-fahmiyon ke daur se pahle jo thi kabhi

wo bartari kahan hai yaqin ko guman par

ek be-karan KHala hai nigahon mein har taraf

yani zamin par hain na hum aasman par

'KHawar' bhi zindagi se nabard-azma hua

kya shaKHs tha jo khel gaya apni jaan par