kya kya na dil pe dagh uThae hue hain hum

kyā kyā na dil pe daaġh uThā.e hue haiñ ham

ik ghar meñ sau charāġh jalā.e hue haiñ ham

ab is chaman se aur ho ummīd kyā hameñ

ai sub.h-e-nau fareb to khaa.e hue haiñ ham

un kī nigāh-o-abrū-o-ruḳhsār kā ḳhayāl

kuchh soch kar gale se lagā.e hue haiñ ham

tasvīr rū-e-yār ke husn-o-sifāt kī

is dil ke aa.ine meñ basā.e hue haiñ ham

ai dost aa ke dekh le mehmāñ-navāziyāñ

ik ḳhāna-e-umīd sajā.e hue haiñ ham

is ḳhauf se ki dil kā janāza nikal na jaa.e

apne ġham-o-alam ko chhupā.e hue haiñ ham

shāyad guzar sabā kā kabhī is taraf se ho

ik rahguzar pe phuul bichhā.e hue haiñ ham

ab vo biThā.eñ dil meñ ki dil se nikāl deñ

'sābir' kisī kī bazm meñ aa.e hue haiñ ham

kya kya na dil pe dagh uThae hue hain hum

ek ghar mein sau charagh jalae hue hain hum

ab is chaman se aur ho ummid kya hamein

ai subh-e-nau fareb to khae hue hain hum

un ki nigah-o-abru-o-ruKHsar ka KHayal

kuchh soch kar gale se lagae hue hain hum

taswir ru-e-yar ke husn-o-sifat ki

is dil ke aaine mein basae hue hain hum

ai dost aa ke dekh le mehman-nawaziyan

ek KHana-e-umid sajae hue hain hum

is KHauf se ki dil ka janaza nikal na jae

apne gham-o-alam ko chhupae hue hain hum

shayad guzar saba ka kabhi is taraf se ho

ek rahguzar pe phul bichhae hue hain hum

ab wo biThaen dil mein ki dil se nikal den

'sabir' kisi ki bazm mein aae hue hain hum