kya kya na dosti ke janaze uThae hain

kyā kyā na dostī ke janāze uThā.e haiñ

thak-hār kar 'adū ke ilāqe meñ aa.e haiñ

aa dekh zindagī tirī 'izzat ke vāste

zaḳhmī laboñ se ham ne tabassum luTā.e haiñ

kis se kareñ savāl ke aavā bhī chāhiye

ham ne bhī chaak par ka.ī kuuze banā.e haiñ

tezāb chhiḌke jā.eñge rū-e-gulāb par

sunte haiñ gulsitāñ meñ vo tashrīf laa.e haiñ

maazī ko haal karne kī ye bhī hai ik lalak

āvāz tū ne dī hai to ham lauT aa.e haiñ

ham par hī raushnī kī imāmat huī tamām

ham ne diye havāoñ ke ghar meñ jalā.e haiñ

sahrā meñ zindagī kī 'alāmat bhī DhūñDhnā

ham bhī ka.ī surāġh vahāñ chhoḌ aa.e haiñ

khīñchī thī tum ne hadd-e-vafā kī jahāñ lakīr

ham hasrateñ tamām vahāñ chhoḌ aa.e haiñ

ye hai kisī ke ġham kī sharī'at kā ehtimām

āñkheñ mirī zarūr haiñ aañsū parā.e haiñ

tohfe meñ tum ne bheje the bujhte diye tamām

aur ham tumhāre vāste 'ḳhurshīd' laa.e haiñ

kya kya na dosti ke janaze uThae hain

thak-haar kar 'adu ke ilaqe mein aae hain

aa dekh zindagi teri 'izzat ke waste

zaKHmi labon se hum ne tabassum luTae hain

kis se karen sawal ke aawa bhi chahiye

hum ne bhi chaak par kai kuze banae hain

tezab chhiDke jaenge ru-e-gulab par

sunte hain gulsitan mein wo tashrif lae hain

mazi ko haal karne ki ye bhi hai ek lalak

aawaz tu ne di hai to hum lauT aae hain

hum par hi raushni ki imamat hui tamam

hum ne diye hawaon ke ghar mein jalae hain

sahra mein zindagi ki 'alamat bhi DhunDhna

hum bhi kai suragh wahan chhoD aae hain

khinchi thi tum ne hadd-e-wafa ki jahan lakir

hum hasraten tamam wahan chhoD aae hain

ye hai kisi ke gham ki shari'at ka ehtimam

aankhen meri zarur hain aansu parae hain

tohfe mein tum ne bheje the bujhte diye tamam

aur hum tumhaare waste 'KHurshid' lae hain