kya kya na zindagi ke fasane raqam hue

kyā kyā na zindagī ke fasāne raqam hue

lekin jo hāsil-e-ġham-e-dil the vo kam hue

ai tishnagī-e-dard koī ġham koī karam

muddat guzar ga.ī hai in āñkhoñ ko nam hue

milne ko ek izn-e-tabassum to mil gayā

kuchh dil hī jāntā hai jo dil par sitam hue

dāman kā chaak chāk-e-jigar se na mil sakā

kitnī hī baar dast-o-garebāñ baham hue

kis ko hai ye ḳhabar ki ba-unvān-e-zindagī

kis husn-e-ehtimām se maslūb ham hue

arbāb-e-ishq-o-ahl-e-havas meñ hai farq kyā

sab hī tirī nigāh meñ jab mohtaram hue

'shā.ir' tumhīñ pe tañg nahīñ arsa-e-hayāt

har ahl-e-fan pe dahr meñ aise karam hue

kya kya na zindagi ke fasane raqam hue

lekin jo hasil-e-gham-e-dil the wo kam hue

ai tishnagi-e-dard koi gham koi karam

muddat guzar gai hai in aankhon ko nam hue

milne ko ek izn-e-tabassum to mil gaya

kuchh dil hi jaanta hai jo dil par sitam hue

daman ka chaak chaak-e-jigar se na mil saka

kitni hi bar dast-o-gareban baham hue

kis ko hai ye KHabar ki ba-unwan-e-zindagi

kis husn-e-ehtimam se maslub hum hue

arbab-e-ishq-o-ahl-e-hawas mein hai farq kya

sab hi teri nigah mein jab mohtaram hue

'shair' tumhin pe tang nahin arsa-e-hayat

har ahl-e-fan pe dahr mein aise karam hue