kya liye jate ho chupke se chhupa kar hath mein

kyā liye jaate ho chupke se chhupā kar haath meñ

dil nahīñ hai gar to kyā hai banda-parvar haath meñ

tez ho jaatā hai aa kar kund ḳhanjar haath meñ

teġh meñ hote haiñ jauhar yaañ haiñ jo sar haath meñ

jo nahīñ pāband-e-duniyā kab hai pāband-e-qafas

tā.ir-e-jāñ ke kabhī aate nahīñ par haath meñ

be-qarārī se shab-e-furqat qayāmat ho ga.ī

maiñ jo taḌpā aa gayā dāmān-e-mahshar haath meñ

til hathelī kā hai daana aur lakīreñ daam haiñ

tā.ir-e-rang-e-hinā aatā hai uḌ kar haath meñ

be-ḳhudān-e-bāġh ko sayyād se hai kyā gazand

bulbul-e-tasvīr ke aate nahīñ par haath meñ

ġhair saaqī aur vo badmast yā-rab ḳhair ho

kyoñ nazākat se nahīñ uThtā hai sāġhar haath meñ

merī turbat par hujūm-e-andalībāñ ho gayā

kaun aatā hai liye phūloñ kī chādar haath meñ

hazrat-e-dil vo nahīñ sunte kisī kā ek harf

tum liye baiThe ho yaañ daftar kā daftar haath meñ

jazba-e-dil ne jo ghabrāyā pahan kar chal diye

haath kā paañv meñ aur paañv kā zevar haath meñ

le uḌā kyā iztirāb-e-justujū-e-nāma-bar

maiñ jo uchhlā aa ga.e jibrīl ke par haath meñ

muflisoñ kā bhī ḳhudā hai tum bhalā aaoge kyoñ

āj-kal kī āshiqī ko chāhiye zar haath meñ

josh-e-vahshat aur hai aur nā-tavānī aur hai

paañv āḳhir rah hī jaate haiñ ulajh kar haath meñ

tum ko ḳhud-bīñ kar diyā mahshar meñ le kar jā.ūñgā

aa.ina zer-e-baġhal dast-e-sikandar haath meñ

huuñ vo dīvāna tirā sahrā meñ jis kī dhuum thī

dekh kar majnūñ uThā letā thā patthar haath meñ

kaun kahtā hai ki tum ne ġhair ko bosa diyā

dekhiye to apnā muñh aa.ina le kar haath meñ

kal kisī kā ḳhuun hogā shahr meñ mash.hūr hai

'shola' mehñdī lag rahī hai aaj ghar ghar haath meñ

kya liye jate ho chupke se chhupa kar hath mein

dil nahin hai gar to kya hai banda-parwar hath mein

tez ho jata hai aa kar kund KHanjar hath mein

tegh mein hote hain jauhar yan hain jo sar hath mein

jo nahin paband-e-duniya kab hai paband-e-qafas

tair-e-jaan ke kabhi aate nahin par hath mein

be-qarari se shab-e-furqat qayamat ho gai

main jo taDpa aa gaya daman-e-mahshar hath mein

til hatheli ka hai dana aur lakiren dam hain

tair-e-rang-e-hina aata hai uD kar hath mein

be-KHudan-e-bagh ko sayyaad se hai kya gazand

bulbul-e-taswir ke aate nahin par hath mein

ghair saqi aur wo badmast ya-rab KHair ho

kyon nazakat se nahin uThta hai saghar hath mein

meri turbat par hujum-e-andaliban ho gaya

kaun aata hai liye phulon ki chadar hath mein

hazrat-e-dil wo nahin sunte kisi ka ek harf

tum liye baiThe ho yan daftar ka daftar hath mein

jazba-e-dil ne jo ghabraya pahan kar chal diye

hath ka panw mein aur panw ka zewar hath mein

le uDa kya iztirab-e-justuju-e-nama-bar

main jo uchhla aa gae jibril ke par hath mein

muflison ka bhi KHuda hai tum bhala aaoge kyon

aaj-kal ki aashiqi ko chahiye zar hath mein

josh-e-wahshat aur hai aur na-tawani aur hai

panw aaKHir rah hi jate hain ulajh kar hath mein

tum ko KHud-bin kar diya mahshar mein le kar jaunga

aaina zer-e-baghal dast-e-sikandar hath mein

hun wo diwana tera sahra mein jis ki dhum thi

dekh kar majnun uTha leta tha patthar hath mein

kaun kahta hai ki tum ne ghair ko bosa diya

dekhiye to apna munh aaina le kar hath mein

kal kisi ka KHun hoga shahr mein mashhur hai

'shola' mehndi lag rahi hai aaj ghar ghar hath mein